Read Hadiyya Mazmuu'l Kitaaba 26 Bible Online

Mazmuu'l Kitaaba 26 - Hadiyya bible

Mazmuu'l Kitaaba 26

¹Waa'a! An muccur ihummi bikkinaa malamoo'n keesenne bakke'ummi bikkinaa iina oogate.

²Waa'a! Saarayyitaatii keentaatii eese moo'e; i wodanoo i tiiroo saarayye.

³Ki eroommi i illagennetti ihu bikkina ki hanqi googonne taakke'oommo.

⁴Awwaad bee'i manninne maqire afuuroommoyyo; labisaaninnem maham issoommoyyo.

⁵Jor issitam kee'n beshoommano hasoommoyyo; boqqi keeninnem maqire afuuroommoyyo.

⁶Waa'a! An jor issumbee'isa moo'iseena anga aanshaqqoommo; kiti'm beyyo do'ummuuyyim kiina otossoommo.

⁷Sagara iimaa'aa galaxxi mazmuura zammarummuuyyi at issitti maalalsiisoo bax hundam kuroommo.

⁸Waa'a! At hee'lloo mine iittoommo; ki lombi hee'oo beyyom iittoommo.

⁹Baaxiilaaninne maqire eese bi'issitte; manna shitam keeninne maqirem i foore bi'issitte.

¹⁰Ixxuwwi hundi ammanem hantaaro sawwitam keeno; odim hundi ammanem maqanxa aa'lleena guddo'oo keeno.

¹¹Ihukkaarem an miiqakkam luwwi bee'i heechcha hee'oommo; at iina qishixxee eesem gatisee.

¹²Hawwodoo luwwi bee'i beyyonne eese uullissitto; ki minaadaphphi wixxixxi lambe'enne ihaa keese galaxxoommo.