Read Hadiyya Mazmuu'l Kitaaba 27 Bible Online

Mazmuu'l Kitaaba 27 - Hadiyya bible

Mazmuu'l Kitaaba 27

¹Waa'i iina caakkaa gatisaanchoo; ee bikkina an ayyem baddoommoyyo; Waa'i eesenne affoo jor hundiinsim egeraancho; ee bikkina eese ayyim baddisooyyo.

²Jor baxxam keen eesem u'nnissam i maso'i eese hawwoddeenaa shiteenaa yakitu'uuyyam ixxuwwi gagim qolanta'a ubbo'o.

³O'l gogot eese kibbuta'nnim an baddoommoyyo; or eesenne ki'uta'nnim an Waa'annemdu bakke'oommo.

⁴An mat luwwa Waa'a xa'mmummo; oohim an lobakata hasoommane; i heechchi doollenne hundannem Waa'i minenne hee'eena, Waa'i maalalsiisoohan ihukkisa moo'eenaa ixxi minenne ixxo uunxeenaa hasoommo.

⁵Eesenne hawwi afoo ballam ixxi iina daato'i ihookko; ixxi minennem eese maaxookko; geejji kinannem qoxxisaa uullisookko.

⁶Ee bikkina eese kibbito'i i diina'a kaa'oommo; liiranchinne «Ilil» yummuuyyi ixxi minenne ixxena kitima hincaa'oommo; anim Waa'a galaxxummuuyyi zammaroommo.

⁷Waa'a! An sagara iimaa'aa ki kollonne laaroommi ammane macceese; atim iina qishixxitaa dabachcha uwwe.

⁸I wodan «Waa'a hase» yukko. Waa'a, an keese hasoommo.

⁹Eese gatisaanchi Waa'a! Ki ille iinniinsi daphphaa'llitte; eesenne ki awwadaanchonne quuqqaa eese qeessititte; at iina hara'mmaancho; eese unjitittee xaddittee.

¹⁰Iyyannii iyyummaa eese xaddota'nnim Waa'i eese abooyyookko.

¹¹Waa'a! Ki googo iina losise; i diina'i bikkinam er googonne awwonse.

¹²Qophphano naqqassam keen boqqoominne eesenne ki'llo'ookko; ee bikkina Waa'a! I diina'i eese hasso'isa issitona higissaa uwwititte.

¹³Foorinne yo'i keen hee'llam uullanne Waa'ika eroomma moo'oommisa amma'nnoommo.

¹⁴Waa'anne neeyyato isse; ki wodan baddoone, at qoxxe; Waa'anne neeyyato isse.