Read Hadiyya Mazmuu'l Kitaaba 30 Bible Online

Mazmuu'l Kitaaba 30 - Hadiyya bible

Mazmuu'l Kitaaba 30

¹Waa'a! At eese gatissitti bikkinaa i maso'im eesenne liiramoo'isa issitbee'i bikkinaa an keese galaxxoommo.

²I Moollanni Waa'a! At iina hara'mmitoo'isina ki kollonne laarummo; at eese fayyiissitto.

³Waa'a! At eese waammanchiinsi gatissitto; xilli barenne aageena maram hee'ummo; ihukkaarem at i foore dabattitto.

⁴Ki'nnuwwi Waa'i minaadab hundim mazmuurinne Waa'a galaxxehe; ixxi keesammi summam galaxxehe.

⁵Ixxi quunqi hofqax ammaninatte; ihukkaarem ixxi bijjoom heechchi doolli hundoominatteme; hiimo wi'llakkota'nnim daranne liiranchi ihookko.

⁶Xumminne yoommi ammane «An hore'em heekke'oommoyyo» yummo.

⁷Waa'a! At iina nuura uwwitti ammane heekke'oobee'i duu'nnisa eese qoxxissitto; ihukkaarem at ki gaga iinniinsi maaxxitti ammane an muggummo.

⁸Waa'a! An ki kollonne laarummo; at hara'mmitonam uunxummo.

⁹I leh kiina maha awwaadookko? An waammamimdu kiina mah awwaadookko? An buchchi ihaa lasage keese galaxxeena xanoommonnihe? amma'nnantaattoohaannoomdu alallaateena xanoommonnihe?

¹⁰Waa'a! I uunxato macceese; iinam qishixxe; Waa'a! At iina hara'mme.

¹¹Iikka kichchechcha liiranchanne dabattaa kadoommisa issitto; iinniinsi xiddi eddechcha sheelattaa liiranchi eddechcha eddeessitto.

¹²Ee bikkina an mazmuurinne keese galaxxoommo bagaan cawwoommoyyo; i Moollan Waa'a! An keese heer heerinam galaxxoommo.