Read Hadiyya Mazmuu'l Kitaaba 31 Bible Online

Mazmuu'l Kitaaba 31 - Hadiyya bible

Mazmuu'l Kitaaba 31

¹Waa'a! An keesenne yabo aageena waaraammo; ee bikkina eese tuussiissitte; at muccur ikki bikkina eese gatise.

²Ki macce i kollonne dabare; qaqqissaa eese gatise; at iina yabo aagoommi kinaa eese gatisseena qoxxaalli girbaa ihe.

³At eese joriinsi egettoo girba; ki summi bikkinaa yitaa at eese awwonse; maroommi googom moo'ise.

⁴An yabo aagummok keesennet ihu bikkina maaxaqqanne qaashakko'i qaashiinsi eese gatise.

⁵Hanqo'i Moollanni Waa'a! i foore ki anganne higisaa uwwaammoo bikkina at eese gatise.

⁶At qophpha'n waa'anne otossitam keeno hundam sabbootto; ihukkaarem an keesenne bakke'oommo.

⁷Ki eroommanne an liiramoommo; lobakatam liiramoommo; i hawwo moo'llaatto; i u'nnam laqqaatto.

⁸I diina'i anganne eese higissaa uwwittoyyo; eesem haraar beyyonne fissitto.

⁹Waa'a! An lobakat hawwonne yoommi bikkina at iina qishixxe; lobakata wi'llummi bikkina i illi jaamaakko; i maarii foorim hoogaakko.

¹⁰I heechchi doolli kichchechchinne i umurim wi'llimminne beeddukko; hawwi lophphimmiinsi ki'ukkok i malaayyi hoogukko; i miqim i woronnem fuuntukko.

¹¹An i diina'ina osachcha i olla'ina naaco eese laqqam keeninam shigigaa'oomman ihaammo; googonnem eese moo'lla'a iinniinsi gibbamuulla.

¹²Lehu manchisa hundim eese xadukko; iiqamukkaare uunjakko'i buchchi mu'uxxisam ihummo.

¹³Dut manni hashashshantamoka an macceesummo; baa'isoo luwwi kolli hundinnem eese kibbukko; ixxuwwim eesenne ki'lleena a'llantamuulla; eese shiteenam sawwite gudissamuulla.

¹⁴Ihukkaarem Waa'a! An amma'nnamoommok keesennette; anim «At iina Waa'a» yoommo.

¹⁵I heechchi hundi ammanem ki angannette; i diina'i angiinsii eese holloo keeniinsii gatise.

¹⁶Ki awwaadaancho eese er illinne moo'e; ki eroomminnem eese gatise.

¹⁷Waa'a! Ki kollonne laaroommuulla ihu bikkina at eese tuussiissitte; ihukkaarem boqqi keen tuuttamisa isse; ixxuwwim suume duudda'a Si'oolanne dillitona.

¹⁸Muccur manchonne amaadinne, gado'innee biranchinnee qophphano woccam kee'n suum duudona.

¹⁹Keesenne yabo aagga'a keese lonsimminne badditam keenina manni illagenne uwwiteena ixxuwwina gudissitti eroommi hinkaa'nna lobakata.

²⁰Dollottam keeniinsi at yoonti beyyonne maaxxootto; ixxuwwaanniinsi qasoo allabiinsim ki minenne daphphaa'llaa egettootto.

²¹Diina'inne kibbamaakkoo beero'onne hee'ummi ammane maalalsiisoo ixxi eroomma iina moo'isu Waa'i galaxxamona.

²²An muggaa «Waa'i illagiinsi bi'aammo» yummo; ihukkaarem an keese weeshummaare at i laachcha macceessitto.

²³Ki'nuwwi Waa'i minaadab hundim Waa'a iittehe; ixxena amma'nnantam keeno jor afoobee'isa Waa'i egerookko ihukkaarem amaadaano laboo'isinne guzumo'ookko.

²⁴Ki'nnuwwi Waa'anne neeyyata issitakkam keen hundim qoxxehe; ki'nnuwwi wodanim baa'oone.