Read Hadiyya Mazmuu'l Kitaaba 32 Bible Online

Mazmuu'l Kitaaba 32 - Hadiyya bible

Mazmuu'l Kitaaba 32

¹Baxxo'i baaxii'lleka haafite siixxito'i keen ixxuwwi hawwojjim shiinshamu keen maassaammuwwa.

²Ixxi baaxiilo Waa'i xigoobee'i manchi ixxi woronnem jolbee'i manchi maasse'amaakkoohane.

³An baaxiilo biiraa yoo'n cawwaa urummi ammane balli hundoomam qitinummi bikkina hoogummo.

⁴Waa'a! Eese ballaa hiimoo guzumo'l bikkina aashaalli luwwi billi iibbanne gogoo'isam i malaayyim i woriinsi mullucaa beeddukko.

⁵Ee lasage i baaxiilo kiina biiraa yummo; an bi'isummi bi'ishsham kiinniinsi maaxummoyyo; hawodummi hawwojji hundam kiina biiraa yeena murte'ummo; atim i baaxil hundam haafitto.

⁶Ee bikkina kiina amma'nnanto'i ki minaadab hundim hawwi ammane keese uunxitamo; malaayyaam hawwi dirisisa afukkaarem ixxuwwa hore'em nakkooyyo.

⁷Waa'a! At iina maaxamoommi beyyo; odim eese hawwiinsi gatissootto; jor afoobee'isa oot ikki bikkina an kiina sagara iimaa'aa zammaroommo.

⁸Waa'im «At marimmi hasisoo googo an losisoommoo awonsoommoo; odim keese sogoommoo egeroommoo» yukko.

⁹Qoossimbee'i faraxxisaa baqullisaa ikkakkotte; ixxuwwi hakkamminnee fuulo'innee masakkantobeeilas ki'nnuwwina ijaajantamoyyo.

¹⁰Jor keen dut hawwonne aaggaamo; ihukkaarem ixxonne amma'nnantam keeno Waa'i ixxi eroomminne egerookko.

¹¹Ki'nnuwwi muccur keen Waa'anne liirammehe; lobakatam liirammehe; woda'n xabbeenoominne Waa'ina ijaajantakkam keen hundim liiranchinne «Ilil» yi'llehe.