Read Hadiyya Mazmuu'l Kitaaba 33 Bible Online

Mazmuu'l Kitaaba 33 - Hadiyya bible

Mazmuu'l Kitaaba 33

¹Ki'nnuwwi muccur keen Waa'anne liirammehe; xabbeen keen Waa'a galaxximmi hasisookko.

²Maasiinqo'inne Waa'a galaxxehe; tommi muuncan yoo diitta'innem ixxena zammallehe.

³Haareechchi mazmuura ixxena zammallehe; diitta'a danaamisa axissakka'a lellehe; liiranchinnem «Ilil» yi'llehe.

⁴Waa'ik sagar hanqa; ixxi bax hundim amma'nnamaakkoohane.

⁵Waa'i muccuroomaa hanqqo'i oogatoo iittookko; uullim ixxi eroomminne wo'mmaakko.

⁶Waa'i iimannuwwa ixxi sagarinne iima'n gogotam ixxi ijaajinne qooccukko.

⁷Dambalaq wo'i hundam mat beyyonne wixxaa'ukko; xillaalli cambalaqquwwam mat beyyonne wixxaa'ukko.

⁸Uulli hundim Waa'a baddona; heer uulli minaadab hundim Waa'a lonsona.

⁹Waa'i wocukkaare uulli qooccamukko; ixxi ijaajukkarem hundem luwwim qoxxaa uullukko.

¹⁰Waa'i ixxo laqqambee'i minaadaphphi a'llancha awwaad bee'an issookko; ixxuwwi sawwitim wo'immoobee'isa issookko.

¹¹Ihukkaarem Waa'ik sogitan heer heerinam qoxxaa hee'ookko; ixxi woda'n sawwitim qaranchi hundinam hee'ookko.

¹²Waa'i ixxuwwina Moollanni ihu minaadab Waa'i ixxi gagina doo'llu minaadabim maassaamo.

¹³Waa'i iimaniinsi aad moo'ookko; ixxim manni oos hundam moo'ookko.

¹⁴Ixxi adilla'n barcumanne afuuraa uullanne hee'oo luwwi hundam aad moo'ookko.

¹⁵Ixxuwwika hundikam wodano qooccukkok ixxuwwi baxxam bax hundam la'ookko.

¹⁶Adil ixxena yoo o'l gogot dut ihu bikkina gatooyyo; geedim ixxi qoxallaninne xorooyyo.

¹⁷O'l faradinne kaa'oommo yakka'a neeyyato issimmi awwadbee'ane; ee faraxxi qoxallanim ayyem gatisooyyo.

¹⁸Waa'ik illi ixxo badditam keenonnette; ixxi eroommim neeyyata issitam keenonnette.

¹⁹Ixxim ixxuwwa lehiinsi gatisookko; qaanne'i maaragem foorinne hee'isookko.

²⁰Waa'i niina egeroohanee hara'mmoohanee ihu bikkina neese ixxonne neeyyato issinoommo.

²¹Ixxi keesammi summanne amma'nnammummi bikkina ni wodan ixxonne liiramookko.

²²Waa'a! Keese neeyyato issinummi niina ki eroommi ihona.