Read Hadiyya Mazmuu'l Kitaaba 34 Bible Online

Mazmuu'l Kitaaba 34 - Hadiyya bible

Mazmuu'l Kitaaba 34

¹An hundi ammanem Waa'a galaxxoommo; i suumim ixxo galaxximma hore'em urooyyo.

²An wodaninnem Waa'anne bakke'oommo; maashaalluwwi eekka macceessa'a liirantamo.

³Waa'a iinninne maqirem lonsehe; mateeyyoominnem ixxi summa iimiimaa'nnona.

⁴An Waa'a uunxummo; ixxim i uunxato macceesaa dabarukko; baddummi luwwi hundiinsim eese gatisukko.

⁵Waa'i kollonne hincitam kee'nnek ilkolli caakkookko; ixxuwwi hore'em tuuttamoyyo.

⁶Ku hawwaanchi Waa'i kollonne laarukko; Waa'im macceesukko; ixxim hawwiinsi hundiinsim gatisuko.

⁷Waa'i asse'amaan Waa'a badditam kee'n kululleetanne ikka'a ixxuwwanne jor afoobee'isa egettamo.

⁸Waa'i danaam ihukkisa moo'llakka'a laqqehe; ixxonne yabo aagookkok maasse'amaakkoohane.

⁹Ki'nnuwwi keesantakko'oo Waa'i minaadab Waa'a baddehe; ixxo badditam keenina mahim hoffe'ooyyo.

¹⁰Hobbi itoo luwwa hoogaa sibaareena xanookko; ihukkaarem Waa'i kollonne hincitam keenina er luwwi mahim hoffe'ooyyo.

¹¹I ooso, waallehe; i woshsha macceessehe; anim ki'nnuwwina Waa'a baddimma losisoommo;

¹²Heechcha mixookkok er luwwam lobakat doollina moo'eena hasookkok ayyette?

¹³Jora wocimmiinsi ki allabo, qophphano wocimmiinsim ki suume ege'lle.

¹⁴Joriinsi gibbaa er luwwa isse; xumma hase; hordoofeme.

¹⁵Waa'ik illi muccur kee'n kollonnette; ixxi maccim ixxuwwi laachcha macceesimmannette.

¹⁶Ihukkaarem ixxek illi jora issitam keeno sabookko; ixxuwwi tiirantambee'isa uulliinsi bi'llamo.

¹⁷Muccur keen Waa'i hara'mmoo'isina laattamo; ixxim ixxuwwi laachcha macceesookko; ixxuwwam afoo hawwi hundiinsim gatisookko.

¹⁸Kichchechchinne wodan iiqamu kee'n gadanonne Waa'i yookko; kichchechchinne tiirbi'u keenom gatisookko.

¹⁹Muccur manchonne dut hawwi afookko; ihukkaarem ee hawwiinsi hundiinsim Waa'i gatisookko.

²⁰Waa'i ixxo erisa egeroo bikkina ixxi miqik matichchim iiqamooyyo.

²¹Baaxiilaano ixxuwwi gaqqi jollim shookko; muccur keeno sabbam keen guzumo'antamo.

²²Waa'i ixxi awwaadaano gatisookko; ixxonne magannaato aaggam keenonnem jor afooyyo.