Read Hadiyya Mazmuu'l Kitaaba 35 Bible Online

Mazmuu'l Kitaaba 35 - Hadiyya bible

Mazmuu'l Kitaaba 35

¹Waa'a! Iinninne uullixxantam keeninne at ixxuwwinnem uullixxame; iinninne qasantam keeninne atim qasame.

²Agiraa mulli o'l mu'utaa amaddaa eese gatisseena ki'e.

³Eese hollitam keenonne ki bagadoo bisa'aa ki'ise; iinam «Keese gatisoommok anette» yihe.

⁴Eese shiteena hassam keen tuuttonaa sholle'llonaa; eesenne jor issiteena a'llantam keen hundim timtimita'a lasonne daba'llitona.

⁵Ixxuwwi hafachchi massoo bura'isa ikkona; Waa'i asse'amaanchi ixxuwwa hollona.

⁶Ixxuwwik goog tunsoo luxuunxaa ihona; Waa'i asse'amaanchim ixxuwwa hollona.

⁷Matem mashkabee'em maaxaqqanne iina qaasha qashsho'ookko; ee'isam eese ubbuusseena xilli bare hinto'ookko.

⁸Sawwitobee'i bichchi ixxuwwanne afona; ixxuwwi maaxxa'a qaashsho'i qaashim ixxuwwa amadona; hinto'i barennem ubba'a bi'llona.

⁹Ee lasage an Waa'anne liiramoommo; ixxi eese gatisu bikkinam lobakata liiramoommo.

¹⁰Anim i mannoomat hundinnem «Waa'a! Hoongaano qoxalluwwi angiinsi buxaa hawwaanom bogaa'n angiinsi gatisookkok kiinni'nnoo'ok ayyette?» yoommo.

¹¹Jor manni eesenne ki'lla'a kasasso'o; an la'oombee'i luwwam eesenne naqqasso'o.

¹²Ixxuwwi eroommi bikkenne jora dabatto'o; ee bikkina an neeyyato murummo.

¹³Ihukkaarem ixxuwwi jabbito'i ammane an xiddi eddechcha edde'ummo. Soommanimminnem i gaga hoogisummo; ihukkaarem i uunxatina dabachchi bee'ukko.

¹⁴Eeham beshichchina te'im iyyabbaayyina issoommisa kichche'aa issummo; ama leto'aare wi'lloo manchisa i horoore heeshaa'aa wi'llummo.

¹⁵Ihukkaarem an hawwummi ammane ixxuwwi hundim wixxita'a liiranto'o; ixxuwwi eesenne osatteena i kululleetanne wixxito'o; an la'oombee'i mogaalli manni uttoo'n eese ganto'o

¹⁶Eese barche'e issita'a eesenne osatto'o; nadadda'ahim ixxuwwi inqe iicco'o.

¹⁷Waa'a! Hinkaa'n balli afeebeedu moo'llaa cawwitootto? Ixxuwwi hantaariinsi eese gatise; i foorem ka hobbiinsi gatise.

¹⁸Ee ammane minaadaphphi lob wixxitenne keese galaxxoommo; dut minaadaphphi lambe'ennem keese lonsoommo.

¹⁹Mashkabee'ekam eesenne ki'llo'i i diina'i liirantamisa issititte; mashkabee'em eese sabbam keen illinne qaqqaxxantamisa issititte.

²⁰Ixxuwwi xumma woccambee'i keeno; xummaan keenonnem hantaaro sawwitam keeno.

²¹Ixxuwwim «Hashshu, hashshu, ki baxika ni illinnem moo'nnaammo» yita'a shuuttu'uuyyi eese kasassamo.

²²Ihukkaarem Waa'a! At eekka moo'llaatto; ee bikkina at cawwitaa uttitte; Waa'a! At iinniinsi qee'llititte.

²³I Moollanna! I Waa'a! At ki'llaa i bikkina fitame; i hanqa at woce.

²⁴I Moollanni Waa'a! At ki muccuroo'mmisinne iina oogate; i diina'im eesenne liirantamisa issititte.

²⁵Ixxuwwi wodanonne «Hashshu, neese ni woda'n mixano anfummo» yitambee'isa isse. Odim «Neese ixxo xuunxaammo» yitambee'isa isse.

²⁶An hawwoommaare liirantam keen hundim tuuttonaa timtimitonaa; «Ixxeensi neese lophphinoommo» yitam keen hundim tuullaa sho'lle'nnaa edde'llona.

²⁷I muccuroomanne liirantam keen «Ilil» yitu'uuyyi lobakata liirantona; «Ixxi awwaadaanchina makkoohaare liiramoo Waa'i iimiimihona» yitona.

²⁸Ki muccuroo'm bikkina alallaatoommo; balli hundoomam keese galaxxoommo.