Read Hadiyya Mazmuu'l Kitaaba 37 Bible Online

Mazmuu'l Kitaaba 37 - Hadiyya bible

Mazmuu'l Kitaaba 37

¹Jor kee'n mashka'inne ajaabantitte; jora baxxam keenonnem to'achchititte.

²Mashka'oomim ixxuwwi hixisa qaqqisom goggamo; buyyisam giggittamo.

³Waa'anne bakke'e; eroommam isse; uullannem xumminne hee'llootto.

⁴At Waa'anne liirame; ixxim ki wodanonne mixxittoka uwwookko.

⁵Ki gooqqeka yabo Waa'ina higissaa uwwe; ixxonnem bakke'e; ixxim kiina hara'mmookko.

⁶Ki muccurooma caakkisa ki hanqam balli eelliinchisa caakkisookko.

⁷Mulli manchina makkoohaaree ixxi jor sawwitim wo'mmoohaaree qacqacititte; at Waa'i illagenne iyyaqqimminne cawwitaa egere.

⁸Quuqimmiinsi daba'lle; nadajjam ure; keese jollenne massoo bikkina qacqacititte.

⁹Mashka'oomim jor keen bi'llamo; ihukkaarem Waa'anne neeyyato issitam keen uulla lago aa'llamo.

¹⁰Hofqaxinatte bagaan jor keen hee'llamoyyo; ixxuwwa hassittaarem hee'llo'i beyyoomam siiddooyyo.

¹¹Ihukkaarem xummaan keen uulla lagaa'llamo; lophphaakkoo xumma siidda'a liirantamo.

¹²Jor manni muccur keenonne dollottamo; ixxuwwannem ki'lla'a inqiiccamo.

¹³Iuhkkaarem ixxuwwi bi'llam balli afukkisa la'oo bikkina Waa'i ee jor keenonne osarookko.

¹⁴Jor keen buxaa hawwaanoo shiteena xiyya chokkotto'o; muccur keenom dutteena bisa'a gudisso'o.

¹⁵Ihukkaarem ixxuwwi bisa'i ixxuwwam shookko; ixxuwwi xiyyim iiqamookko.

¹⁶Jor manchina yoo lobakat amaxxiinsi muccur manchina yoo hoffi amaxxi lophphookko.

¹⁷Mashka'oomim jor kee'n wod iiqamookko; ihukkaarem Waa'i muccur keenina hara'mmookko.

¹⁸Waa'i muccur keeno la'ookko; ixxuwwi gulummam mulli manni massooyyo.

¹⁹Jor doollennem ixxuwwanne hawwi afooyyo; qaane'i maaragem ixxuwwina amaxxi hoffe'ooyyo.

²⁰Ihukkaarem jor keen bi'llamo; Waa'i diina'i udma'i fiitisa giggittamo; wirii'llisam binnitamo.

²¹Jor manchi liqaayyo aa'ookko bagaan dabaraa miqooyyo; ihukkaarem muccur manchi biijoominne uwwookko.

²²Waa'i maasse'u keen uulla lagaa'llamo; ihukkaarem Waa'i duumu keen bi'llamo.

²³Waa'i mat manchi taakkonne liiramulas ixxi taakki hanqo'an ihukkisa la'isookko.

²⁴Waa'i ee mancho ixxi anginne bakkiisoo bikkina ixxi qolamuta'nnim ubooyyo.

²⁵An oosoommaniinsi ki'isaa lommannan afeebe'e hee'aammo; Waa'i muccur mancho xadukkuuyyi te'im ixxi oos hurbaata uunxukkuuyyi moo'ummoyyo.

²⁶Ixxi hundi ammanem biijoominne uwwookkoo liqaayyisookkoo; ixxi oosim maasse'anto'oo keen ikkamo.

²⁷Jor luwwiinsi qee'lle; er lwwa isse; heer heerinam hee'llootto.

²⁸Mashka'oomim Waa'i hanqa iittohane; ixxena amma'nnanto'i minaadabam urooyyo; ee keeno heer heerinam egerookko; ihukkaarem jor kee'n shumo'i bi'ookko.

²⁹Muccur keen uulla lagaa'ookko; ee uullannem heer heerina hee'ookko.

³⁰Er manchi suumiinsi qooroo'm woshshi firookko; ixxi allabinnem hanqa wocookko.

³¹Ixxi Waa'ikim seer ixxi wodanonnette; ixxim ee seeriinsi hore'em koratooyyo.

³²Jor manchi muccur mancho dugaa egerookko; sheenam hasookko.

³³Ihukkaarem Waa'i ixxi anganne higisaa uwwooyyo ogaxxi minenne fitamoo ammanem neegaramoo'isa issooyyo.

³⁴Waa'anne neeyyato isse; ixxom egere; ixxim kiina uulla lagaa'isaa keese lonsookko; jor keen bi'llu'uuyyim at moo'llootto.

³⁵Jor mogaalli manchi iimiimaa Liibaanoos digiphphisam lataakkoo moo'ummo.

³⁶Ihukkaarem ee beyyinne daba'llaa higummuuyyi beyyonne hoogummo; hasummaarem ixxo siideena xanummoyyo.

³⁷Miiqakkam luwwi bee'i mancho qoossitaa moo'e; xabbeen manchom ersa moo'e; xummaanchi manchik shumo'i fikkaannookko.

³⁸Ihukkaarem baaxiilaan hundim bi'llamo; jor kee'n shumo'im bi'ookko.

³⁹Waa'i muccur keeno gatisookko; hawwi ammanem yabo aaggamok ixxonnette.

⁴⁰Waa'i ixxuwwa hara'mmookkoo gatisookkoo; ixxuwwi ixxonne yabo aago'i bikkina; jor kee'n angiinsi gatisookko.