Read Hadiyya Mazmuu'l Kitaaba 38 Bible Online

Mazmuu'l Kitaaba 38 - Hadiyya bible

Mazmuu'l Kitaaba 38

¹Waa'a! Ki quunqinne eese guzumo'llitte; te'im ki bala'inne eese axeettitte.

²Ki xiyyinne eese qassaatto; ki anginnem eese aphphissaatto.

³Ki quunqiinsi ki'ukkok i orachchonne fayya'oom bee'e; i baaxii'l mashka'inne i miqenne xummi bee'e.

⁴I baaxiil eese xuuxaakko; kee'mmaalli iyyi qaxam eesenne kee'mmaakko.

⁵I huushanchi mashka'inne i omar shamaa bobukko.

⁶An quutummo; lobakatam sholle'ummo; balli hundam kichchechchinne hosummo.

⁷I orachchonne shokki aphphoolla; iinam kee'mmaallisa xissaakko.

⁸An lobakata hoogaammo; iiqamaammome; i wodan u'nnanne yoo bikkina qitinoommuulla.

⁹Waa'a! I mixan hundam at laqqootto; i qitinimmim kiinniinsi daphphaakkoohaneyyo.

¹⁰I wodan lobakata aphphisoolla; i malaayyi hoogaakko; i illim jaamaakko.

¹¹I oma'l mashka'inne i beshii i olla'ii iinniinsi gibbo'ookko; i qarmannim iinniinsi qee'llita'a uullito'ookko.

¹²Eese shiteena hassam keenim qaasha qaashsho'o; eese hawwoddeena hassam keenim eese bi'isseena a'llanto'o; eesenne dollotimma hore'em u'tto'oyyo.

¹³An gawwi manchisa ihummi bikkina macceeseena xanummoyyo; duud manchisa ihummi bikkinam woceena xanummoyyo.

¹⁴An macceseenaa woceenaa xanoobee'i manchisa ihaammo.

¹⁵Ihukkaarem i Waa'a! An an keese egeroommo; i Moollanni Waa'a atim iina dabachcha uwwitootto.

¹⁶I maso'i eesenne liirantamisa issititte; an uboommaarem eesenne bolxitamisa issititte.

¹⁷An ubeena ihaammo; i xissim wonja'a uwwukkoyyo.

¹⁸An i bi'ishsha biiraa yoommo; i baaxii'l bikkinam saxxoommo.

¹⁹Malaayyaammuwwi i maso'i duta; mashkabee'ekam ceese sabbam keenim araqa.

²⁰An eroka issummi bikkina jora dabatto'o; an hanqa baxeena yakummi bikkina iinninne uullixxanto'o.

²¹Waa'a! At eese uttitte. I Moollanna! At iinniinsi annanni ikkitte.

²²Eese gatisaanchi i Waa'a! At iina qaqqissaa hara'mme.