Read Hadiyya Mazmuu'l Kitaaba 39 Bible Online

Mazmuu'l Kitaaba 39 - Hadiyya bible

Mazmuu'l Kitaaba 39

¹An «Issoommi luwwi hundannem i gaga ega'lloommo; i allabim baaxiillonne massona cawwoommoyyo; jor keen yo'i beyyonne maham wocoombee'isa i suume ege'lloommo» yummo.

²Mat sagaram wocoombee'isa duudummo; er luwwi ihuta'nnim maham wocoombee'isa duudummo; ihukkaarem i asqachchi eraa'llaanniinsi baasukkuuyyi marukko.

³I wodan i woronnem shokkukko; sawwit lophphimmiinsi ki'ukkok eesenne giir aphphukko; ee lasage i suuminnem

⁴«I Waa'a, an ka lasage hee'oommok hinkaa'n balla? An lehoommokdu hinkaa'n ammane afaatette? An hinkaa'n balla hee'oomda'e la'ise» yummo.

⁵I heechchi doolle keentaa qooddaatto. I umurim ki illagenne mahim bee'aannisa; hanqinam manni hundim fooshshe'akko'i fooshshisa.

⁶Hanqinam manni hawwaankaannisa; ixxi badallat hundim awwaad bee'ane; amaxxa wixxaa'ookko; ihukkaarem ayyi itooda'e la'ooyyo.

⁷Waa'a! Kabadu i neeyyat ayyette? Atetteyyonnihe?

⁸Waa'a! I baaxiil hundiinsem eese gatise; eesenne qawwuwwi osattamisa issititte.

⁹Ka hundam eesenne issittok atette ikki bikkina mat sagaram woccoombee'isa duudaa cawwoommo.

¹⁰Ki anginne eese aphphissi bikkina leheena ihaammo; kaba eese od aphphisimma ure.

¹¹Baaxii'l bikkina mancho axeettoottoo guzumo'lloottoo; ixxi iittoo luwwi hundam bil bi'isoo luwwisa issitootto; hanqinam manni hundim fooshshe'akko'i fooshshisa.

¹²I Waa'a! I uunxatoo i laachchaa macceese; an wi'lloommi ammane cawwitaa uttitte; an ki waaraancho; iyyanno'isam koyyiincho.

¹³Od daba'llaa waaroombee'i beyyo mareembe'i afeebe'e hofqax ammaninam liirancha siidoommisina uttaa ure.