Read Hadiyya Mazmuu'l Kitaaba 40 Bible Online

Mazmuu'l Kitaaba 40 - Hadiyya bible

Mazmuu'l Kitaaba 40

¹Waa'i hara'mmoo'isina iyyaqqimminne egerummo; ixxim ixxi macce i kollonne dabaraa i laachcha macceesukko.

²Ixxim xuuxoo xilli bariinsii leepho'iinsii eese fissukko; i lokkom kinanne uullisukko; i mogole'em qoxxisukko.

³Ixxim iina haareechchi mazmuura uwwukko; ee bikkina galaxxi mazmuura ni Waa'ina zammaroommo; dut keen eekka moo'lla'a badditamo; Waa'annem bakke'llamo.

⁴Xale'i Waa'anne bakke'llam keen, amaadaano awwontambee keenii qophphano shigigitam keenii maassaammuwwa.

⁵Ni Moollanni Waa'a! At niina maalalsiisoo dut luwwa issitaatto; at niina sawwitoo sawwite ayyim xigeena xanooyyo; ee kee'n bikkina kureenaa woceenaa yakumta'nnim xigiinsi lobane.

⁶At kitimaa kiina uwwakkam luwwaa hassooyyo; shokkiisakka'a hincaa'akkam kitimaa baaxii'l bikkina hincoo kitimaa hassooyyo; ihukkaarem orachcho iina gudissitto[3].

⁷Ee bikkina «See'l kitaabanne i bikkina kitaabamukkisannem oono'o an waaraammo.

⁸I Waa'a! An ki doo'lla wonsheena hasoommo; ki seerim i wodanonnette» yummo.

⁹Minaadaphphi dummichchanne hanqa alallaatoommo; Waa'a, at laqqoo'isam eekka wocoo'n cawwummoyyo.

¹⁰Ki hanqa i wodanonne maaxummoyyo; kiikka amma'nnantaattoohaannoomaa gatisaanchoomaa alallaatoommo; minaadaphphi dummichchiinsi ki eroommaa hanqaa daphphaa'ummoyyo.

¹¹Waa'a! At ki qishixxato iinniinsi hoottitte; ki eroommii amma'nnantaattoohaannoomii eese hundi ammanem egerona.

¹²Xigakkeena xanakkambee'i hawwi eese kibbaakko; i baaxiil lophphaa eesenne gunguussamu bikkina moo'eena xanummoyyo; i baaxiil i horoo'l saraatiinsi lophphaakko; ee bikkina i wodan hoogaakko;

¹³Waa'a! Ki doo'l ihulas eese gatise; Waa'a! Qaqqissaa iina hara'mme.

¹⁴Eese shiteena hassam keen hundim tuuttonaa timtimitonaa; iina jolle mixxam keen hundim sholle'lla'a loso daba'llitona.

¹⁵An uboommaare «Hashshu! Hashshu!» yitam keen tuutta'a musmusitona.

¹⁶Ihukkaarem keese hassam keen hundim keesenne lobakata liirantona; ki gatisimma iittitam keen hundi ammanem «Waa'ina lombi ihoona» yitona.

¹⁷Waa'a! An hoongaanchoo buxichchoo; ihukkaarem at eese unjitooyyo; at haramaanchoo gatisaanchoo ikki bikkina qaqqissaa iina hara'mme.