Read Hadiyya Mazmuu'l Kitaaba 41 Bible Online

Mazmuu'l Kitaaba 41 - Hadiyya bible

Mazmuu'l Kitaaba 41

¹Buxina hara'mmitam keen maasse'anto'oo keeno; ixxuwwi hawwitam ayyaamom Waa'i ixxuwwina hara'mmookko.

²Waa'im ixxuwwa egerookko; foorinnem hee'isookko; uullannem ixxuwwa maasse'ookko; diina'inam ixxuwwa higisaa uwwooyyo.

³Xissita'a dakkanne iinse'llam ammanem Waa'i ixxuwwina hara'mmookko; ixxuwwam jabbiinsi fayyiisookko.

⁴Anim «Waa'a! An keese hawwodaammo; ee bikkina at iina haafihe; at iina qishshixxitaa eese fayyiise» yummo.

⁵I diina'i dut jor luwwa i bikkina woccamuulla; ixxuwwik mixxan an lehaa xadamoommisinatte.

⁶Eese moo'lleena waattamokim hanqo'i wodaninneyyo; ixxuwwi i bikkina jor woshsha wixxaa'llu'uuyya fitta'a lasagem beyyi hundannem i summa bi'issamuulla.

⁷Eese sabbam keen hundim ixxuwwina'i ixxuwwim hashaashshantamuulla; eesennem jor lawwi afona mixxa'a

⁸«Ixxo jor jabbi amadaakko; ixxi ka iinse'u beeyyiinsi ka lasage ki'ooyyo» yitamuulla.

⁹An hundiinsi lonsaa amma'nnoommi i beshichchi inninnem daayyamaa itukkok eesenne ki'ukko.

¹⁰I Waa'a! At eese fayyiise; baado miqisoommisinam eese ki'ise.

¹¹I diina'imdu eese kaa'llobeelas at eese iittittisa eehanninne la'oommo.

¹²An hanqa egerummi bikkina eese uunjitooyyo; ki illagennem eese heer heerina hee'issootto.

¹³Isra'ee'l Moollanni Waa'i heer heerinam galaxxamaakkoohan ihona; eeya ihona.