Read Hadiyya Mazmuu'l Kitaaba 44 Bible Online

Mazmuu'l Kitaaba 44 - Hadiyya bible

Mazmuu'l Kitaaba 44

¹Waa'a! Gaassi doollenne niyyanno'ina baxxitti maalalsiisoo luwwi hundam ixxuwwi niina kutto'aare neese ni maccinnem macceensaammo.

²At ki gagim mulli minaadaba ixxuwwi gaqqi uulliinsi hollitaa ee beyyonne niyyanno'o kaassitto; mulli minaadaba aphphissaa ki minaadaba wolabbanonne fissitto.

³Ixxuwwi ee uulla lagaa'llo'ok ixxuwwi bisa'inneyyo; kaa'llo'okim ixxuwwi malaayyinneyyo; ee hundam ixxuwwina issittok at ixxuwwa iittitti bikkina ki malaayyi, ki wodii ki lombi caakkii ixxuwwinne maqir ihu bikkinatte.

⁴At iina Waa'aa adilaa; ki minaadab ikko'i Yaaqoob shumo'ina kaachcha uwwitoottok atette;

⁵Ki mallaayyinne ni diina'a kaa'nnoommo; ni maso'om ki summinne hancaacammoommo.

⁶Eese gatisookkoo yaa i xiyyannee i bisa'annee bakke'oommoyyo.

⁷Ihukkaarem ni diina'iinsi neese gatissoottok atette; neese sabbam keenom sholliissootto.

⁸Ni Waa'a! Neese hundi ammanem keesenne bakke'nnoommo; ki summam heer heerina galaxxinoommo.

⁹Ihukkaarem kaba at neese sabbittoo sholliissittoo; ni gaadaaninnem maqire firimma sabbitto.

¹⁰Ni diina'iinsi gimbaa laso daba'llinoommisa issitto; ni diina'im ni amaxxa hundam bogga'a massito'o.

¹¹Neese duramoo gereebbisa issitto; mulli minaadaphphi lambe'ennem binnaa'llitto.

¹²Ki minaadaba bushaalli bitina biteessitto; ee bitiinsem siidditti tirfi mahim bee'e.

¹³Ni olla'i neese game'llitamisa issitto; ni kululleetanne yo'i keeninam neese osachchaa lelloo issitto.

¹⁴Mulli minaadaphphi lambe'enne neese heessi issitto; manni neese gadaa horoore heekkeesoo'isa issitto.

¹⁵An balli hundam shollechchannette; tuullim eese ifiisaakko.

¹⁶Oohim eese gadoohii naaccam keenii yitam woshshiinsii i diina'iinsii baado miqisseena hassam keeniinsii ki'aatette.

¹⁷Ku hundim neesenne afukkok nees keese xandoo'nnette; kiinninne maqire aangiummi hidirom gindinoo'nnette.

¹⁸Ni wodanom kiinniinsi laso daballummoyyo; ki ijaajom gindinummoyyo.

¹⁹Ihukkaarem at neese iiqansitaa moochchi lambe'enne ubbuussitto; gambabbaakkoo tunsi woronnem neese uttaa uttitto.

²⁰Ni Waa'ina neese otossimma ullaa ni anga iimaa'nnaa mulli waa'a uunxinaammoota'n

²¹Waa'i eekka la'ooyyonnihe? Ixxi ni wodanonne maaxamu luwwam la'oohaneyyonnihe?

²²Ihukkaarem ballina ballina lenoommuullakii duramoo gereebbisa xigammoommokii ixxi bikkinatte.

²³Waa'a! Baqihe, At mahina diriittaate? Ki'e! Heer heerinam neese uunjitaa uttitte.

²⁴Ni hawwoo ni wor amadanchaa xaddaa ki ille niinniinsi mahina maaxxoolla?

²⁵Neese ki'nnoombee'isa buchchanne umbaammo; ni orachchim buchcanne exxaakko.

²⁶Ki eroommi bikkinaa yitaa ki'llaa waattaa neese hara'mmee gatisee.