Read Hadiyya Mazmuu'l Kitaaba 45 Bible Online

Mazmuu'l Kitaaba 45 - Hadiyya bible

Mazmuu'l Kitaaba 45

¹I wodaniinsi er woshsha fissummuuyyi adilina ka mazmuura zammaroommo; erisa kitaaboo manchi iskibirto'inne kitaabeena gudoo'isam i suumim mazmuura zammareena gudaakko.

²At manni hundiinsim danaamo; ki suumiinsim eroommi daadoohane; ee bikkina Waa'i keese heer heerinam masse'aakko.

³Lombinnee hibbinnee wo'mmitaattoo malaayyaam adila, ki lamadonne bisa'a lade'llaa gude.

⁴Ki hanqi bikkina, xummi bikkinaa muccuroo'm bikkinaa lomba edde'llaa kaachchina mare; ki makki angi maalalsiisoo luwwa moo'isona.

⁵Ki xiyyuwwi siifuwwa; ixxuwwim ki diina'ika wodano qassa'a aaggamo; minaadabim ki lokkiinsi woroon ubookko.

⁶Waa'a! Ki adillan heer heerina hee'oohane; ki adilla'n biccim hanqinne gassoohane.

⁷At hanqa iittitaa jolle sabboohane; ee bikkina ki Moollanni Waa'i keese doo'llaa ki besh hundiinsim loboka keesenne liiranchi zayta labukko.

⁸Ki eddechchi karbe'iinsi, geneeno'iinsii birgudiinsii baxamu shitto'inne enje'oohane; daane'i inqinne wereeggaakkoo ki adilla'n minenne diitta'ikii maasiinqo'i sagarii keese liiransookko.

⁹Ki adilla'n minenne yo'i landi lambe'enne adilluwwi landim yo'o; ki makki kollonne yo'i adila lobakata danaam worqinne wereeggaakkoo eddechcha edde'lla'a uullito'ookko.

¹⁰Taa i landichche, an kiina wocoommoka qoossitaa macceese; ki maccem i kollonne dabare; ki minaadabaa kiyyanni minee xade.

¹¹Ki dan adil keese iittoo'isa issaakko; ihukkaarem ixxi kiina moollanni ihu bikkina ijaajame.

¹²Xiiroos uulli minadab kiina irifo'o eebookko; goddaanim keese qooxxaqqookko.

¹³Adi'l minenne yo'i adi'l landichcho lobakata wereeggito'ookko. Is eddechchim worqinne wereeggaa belecce'oohane.

¹⁴Isem wereeggi eddechcha eddeesakka'a adi'l beyyo hincaa'akkamo; baajaammuwwi is saawwuwwim ise kibbita'a waattamo.

¹⁵Lobakat liiranchinnee kajjinnee waatta'a; adi'l mine aaggamo.

¹⁶Kiyyanno'i bikkenne adilluwwi ihoo dut oos kiina hee'ookko; atim ixxuwwa uulli hundannem adilluwwi issitootto.

¹⁷Anim ki sado qaranchi hundim lonsoo'isa issoommo; ee bikkina minaadab hundim keese heer heerina galaxxookko.