Read Hadiyya Mazmuu'l Kitaaba 50 Bible Online

Mazmuu'l Kitaaba 50 - Hadiyya bible

Mazmuu'l Kitaaba 50

¹Hundam xanoo Moollanni Waa'i wocoolla; eelliinchi firoo kolliinsi aagoo kollonne afeebee yoo uulli minaadab hundam weeshoolla.

²Kurakkam luwwi bee'i danaam Xiyoo'n beero'iinsi Waa'i caakkisoolla.

³Ni Waa'i waarookko; cawwaa urooyyo; ixxi illagenne itoo giir yookko; ixxi kululleetannem malaayyaam hambu'llam yookko.

⁴Ixxi minaadabanne oogatukkuuyyi iimanii uullii naqqassamisina weeshukko.

⁵Ixxim «Kitima uwwimminne iinninne hidiro aaggo'i amma'nnanto'oo i minaadaba i beyyonne wixxaa'llehe» yoolla.

⁶Waa'i honqo'i oogataanchi ihukkisa iiman alallaatookko.

⁷Waa'im «I minaadaba, i woshsha macceessehe; Isra'eela, an keesenne naqqasoommo; ki Moollanni Waa'i anette.

⁸Ki kiti'm bikkinaa at hundi ammanem shokkiissaa hincaa'lloo kiti'm bikkinaa an keese acceeqasoommoyyo.

⁹An ki gaadiriinsi moolluwwa ki orodiinsim fella'a ambulluwwa masseena hasoommoyyo.

¹⁰Haqqo'l moochchii kum duunnuwwanne allaa'lloo diinatii hundim iihane.

¹¹Iima'n cii'i hundam an la'oommo; ullanne mikmikoo fooraam luwwi hundim iihane.

¹²«Uullii ullanne yoo luwwii hundim iihan ihu bikkina an sibaarumta'nnim kiina kuroommoyyo.

¹³An moolluwwika maara itoommoyyo; fella'ikam xiiga agoommoyyo.

¹⁴Waa'ina galaxxi kitima uwwe; Hundiinsi lob Waa'inam aaggitti uga'a uwwe.

¹⁵Keesenne hawwi afoo ayyaamo eese weeshe; an kese gatisoommo; atim eese lonsitootto» yukko.

¹⁶Ihukkaarem Waa'i jor manchina «I seera qananaa'lleena i Hidi'l sagaram ki suuminne wocceena at marichcho?

¹⁷An kurummi woshsha aa'imma sabbaatto; i ijaajom gaddaa afareen uunjitaatto.

¹⁸Gamaancho moo'lloo ammane ixxennem gamina geettootto; saa'aanchinnem ginnooma amaddootto.

¹⁹«At jora wocceena hundi ammanem guddaattoohane; ki allabim qophphano woceena muxmuxoohane.

²⁰Afuuttaatim kiyyaabbaayyo hamtootto; Kiyyumbeetikam summa bi'issootto.

²¹Ee keeno hundam issittuuyyi an cawwaa urummi bikkina anim ki'isa ihummoka labissaatennihe? Ihukkaarem an kaba woshshooma ki illagenne caakkisaa keese axeeroommo.

²²«Eese xaddakkam keen hundim kaka macceessehe; ee bee'aare ki'nnwwa bi'isoommo; gatisookkokim hee'ooyyo.

²³Iina galata kitim issaa uwwookkok eese lonsookko. Hanqi googonne mattam keen hundam gatisoommo» yukko.