Read Hadiyya Mazmuu'l Kitaaba 51 Bible Online

Mazmuu'l Kitaaba 51 - Hadiyya bible

Mazmuu'l Kitaaba 51

¹Waa'a! Ki eroommi bikkinaa yitaa haafihe; ki lob qishixxaxxi bikkinaa yitaatim i baaxiilo shiinshe.

²An hawwodummi hawwojji hundam aanshitaa hoore; i baaxiiliinsim eese muccusse.

³I bi'ishsham an la'oommo; i baaxiilim hundi ammanem i illagennette.

⁴An keese hawwodaammo; an hawwodummok xale'i keesette; ki illagennem jor luwwa issaammo; ee bikkina at eesenne oogattitit oogat hanqo'anee miiqakkam luwwi bee'anee.

⁵Iyyummi godabonne qooccamummaanniinsim ki'isaa baaxiilaancho; ee baaxiilinnem qaramummo.

⁶At xabbeenoomaa hanqaa hassoo bikkina iina xilli qoorooma la'oommisina losise.

⁷Hiisoophphi buyyinne kiffaa eese muccusse; anim muccuroommo; at eese aanshe; anim baradiinsi lophphaa qadaalloommo.

⁸Liiranchaa lobakat liiranchi sagaraa macceesise; at iiqqaa xaamsitti i miqqeewwim liiramona.

⁹I baaxiilo at xiggitte; keese hawwodummi hawwojji hundam shiinshitaa hoore.

¹⁰Waa'a! Eesenne muccur wodano qoocce; haareechchi xabbeen ayyaana i woronne isse.

¹¹Ki gadaniinsi eese qeessititte; ki Keesammi Ayyaanam iinniinsi massititte.

¹²Ki gatisimmi liirancha iina dabattaa uwwe; anim kiina ijaajamoommi tiiro uwwe.

¹³Keese hawwoddam keenina ki gogo losisoommo; baaxiilaanim ki kollonne daba'llitamo.

¹⁴Eese gatisaanchi Waa'a! Xiiga dunimmiinsi eese gatise anim ki muccuroo'm biikkina ilil yummuuyyi zammaroommo.

¹⁵Waa'a! I suume fooqaa'e; anim ki galata alallaatoommo.

¹⁶At kitima iittitoohan ihuta'n uwwam hee'ummo; shookkiisakka'a hincaa'akkam kitimim keese liiransooyyo.

¹⁷Waa'a! At iittitoo kitim gaga heeshaa'aakkoo tiiro. Waa'a! Baaxiilo biiraa yoo maashaalli wodano gaddooyyo.

¹⁸Waa'a! At ki eroomminne Xiyoo'n beero'ina er luwwa isse. Yerusaalee'm beero'om kininne qashe.

¹⁹Ee lasage muccur kitimii shokkiisakka'a hincaa'akkam kitimii keese liiransookko. Kiina kitima hincaa'akkam beyyonnem moolluwwa kitimakkamo.