Read Hadiyya Mazmuu'l Kitaaba 55 Bible Online

Mazmuu'l Kitaaba 55 - Hadiyya bible

Mazmuu'l Kitaaba 55

¹Waa'a! I uunxato at macceese; i uunxatom macceesimma sabbitte.

²I uunxato at macceessaa dabare; eese u'nnisoo luwwiinsi ki'ukkok heekke'amaammoo wonciwoncaammoo.

³I diina'i sha'llanchiinsii leencanchiinsii ki'ukkok baddaammo; ixxuwwi maso'oominnee quunqinnee ki'lla'a eesenne hawwo afissamuulla.

⁴I wodan lobakat baachchinne u'nnamaakko; lehim eese baa'isaakko.

⁵Baachchii huxechchii ese amadaakko; eehanniinsi ki'ukkok i mannoom hundim heekke'amaakko.

⁶Iina handarekkichchisa lad hee'uta'n usheexxat yoo beyyo bararaa maram hee'ummo.

⁷Eeyya, qee'l uulla maraa udma'i uullannem hee'am hee'ummo.

⁸Ka hambu'llamiinsii wiisho'iinsii gibaa maaxameena qaqqisaa maram hee'ummo.

⁹Waa'a! Beero'onne damigimmaa hambalaachchaa moo'ummi bikkina ixxuwwika tiiro bi'ise; ixxuwwi suumem mat ihoobee'isa isse.

¹⁰Kininne baxamu beero'i qash hanenne hiimoo ballaa do'llamuulla; ee beero'i woronne jollii hantaarii wo'mmaakko.

¹¹Bichchi ee beero'i woronne wo'mmaakko; manni wixxoo beyyi hundannem damigimmii hantaarii wo'mmaakko.

¹²Eese game'llookkok i diina'ayyo; i diina'i ihuta'nna'e an iyyaqqam hee'ummo; eesenne amaadookkok i masokkichchoyyo; eehid ihuta'nna'e ixxeensi maaxamam hee'ummo.

¹³Ihukkaarem ka hundam issitootti at i gaqqi mancho, i saawwoo i kobichchoo.

¹⁴Waa'i minenne minaadaphphi lambe'enne maqirem daba'llammummo; ni mateeyyoomannem liiransoo iitti hee'ukko.

¹⁵I maso'ina leh qaqqisona; ixxuwwi minennee tiironnee jolli wo'mmu bikkina foorinne hee'llu'uuyyim waammantona.

¹⁶Ihukkaarem an i Moollanni Waa'i kollonne laaroommo; ixxim eese gatisookko.

¹⁷An hiimoo daraa ballaa hundi ammanem ixxi kollonne laaroommo; ixxena kuroommo; ixxim i sagara macceesookko.

¹⁸Lobakata dut diina'inne oramoommi qasanchiinsi eese xummam dabaraa worookko.

¹⁹I diina'i jor googiinsi daba'llit'oibeei bikkina Waa'am badditobee'i bikkina heer heerina Moollanni Waa'i i uunxato macceesaa ixxuwwa sholliisookko.

²⁰I beshichchi hee'u manchi ixxi besha hawwodukko; aagu hidi'l saqaram gindukko.

²¹Ixxek woc buuriinsi loboka lii'llaalla; ihukkaarem ixxi wodan jollinne wo'mmaakkoohane; ixxek sagar zayitiinsi loboka lii'llaalla; ihukkaarem qare'aalli bisa'isa muroohane.

²²Ki hawwi hundam Waa'ina kure; ixxim keese bakkiisaa uullisookko; muccur keen ubbona moo'aa heer heerina cawwaa urooyyo.

²³Ihukkaarem Waa'a! Manna shitam keenoo hantaaraanoo ixxuwwi umu'llekka kollom affoo'n xillaalli barenne waammitootto; ihukkaarem an Waa'anne amma'nnamoommo.