Read Hadiyya Mazmuu'l Kitaaba 6 Bible Online

Mazmuu'l Kitaaba 6 - Hadiyya bible

Mazmuu'l Kitaaba 6

¹Waa'a! Ki quunqinne eese axeettitte; ki nadajjinnem eese guzumo'llitte.

²Waa'a! An hoogaanchi ihummi bikkina at iina qishixxe; i Mogole'i huxe'u bikkina fayyiise.

³Waa'a! An lobakat uu'nnannette; eehaare at iina hara'mmitoobee'ek hinkaa'n balli afeebe'e?

⁴Waa'a! At daba'llitaa iina agaage; ki eroommi bikkina gatise.

⁵Lehaa lasage keese sawwookkok bee'e; waammi woronne ihaadu keese galaxxookkok ayyette?

⁶Kichchechchi lophphimmiinsi ki'aa hoogaammo; hiimina hiimina indiidinne i dakka aashisoommuulla; bakke'oommi luwwam indiiddinne lukubisoommuulla.

⁷I illi indiiddi lophphimmiinsi ki'aa jaamaakko; i diina'i lophphu bikkinam moo'imma hoogaammo.

⁸Waa'i an wi'lloommi sagara macceesu bikkina jora baxxakkam keen hundim iinniinsi qee'llehe.

⁹Waa'i i uunxato macceesaakko; Waa'i i xa'mmichchinam dabachcha uwwaakko.

¹⁰I diina'i hundim tuuttamo; lobakatam muggitamo; dangonnem sholle'lla'a laso daba'llitamo.