Read Hadiyya Mazmuu'l Kitaaba 60 Bible Online

Mazmuu'l Kitaaba 60 - Hadiyya bible

Mazmuu'l Kitaaba 60

¹Waa'a! At neese uunjitaa uttaatto; neese iiqqaatto; niinninne quuqqaatto; ihukkaarem kaba neese dabattaa areese.

²Uulla huxiissaa diqansitto; ee diqamu uulla dabattaa fayyiise.

³Ki minaadab lobakata hawwitamisa issitto; dimbisoo woyi'n diqaasa agissaa tartarinommisa issitto.

⁴Ihukkaarem keese badditam keen diina'i xiyyiinsi xottamisina mare'e uwwitto;

⁵At iittitoo ki minaadab gatoo'isina ki makki anginne neese gatise; ki malaayyinnem neese gatise; ni uunxatom macceese.

⁶Waa'i ixxi Keesammi Minenne ihaa «An kaa'ummi bikkina Seekee'm uulla baxxansoommo; Suukooxxi lete'em i minaadabina baxxansoommo.

⁷Gala'aadii Minaasii iihane; Efireem iina o'l qoobe'e; Yihud i adlla'n bicco.

⁸Moo'aab an aanshaqqoommi mu'uta; Eedoomanne i caamma'a daraboommo; Filisxeema kaa'ummi bikkina liiranchinne diraamoommo» yukko.

⁹Girbamu beero'o eese ayyi massookko? Eedoom afeebeedu eese awwonsaa ayyi massookko?

¹⁰Waa'a! Hanqinam at neese uunjitaa uttittonnihe? Ni gaadaan maqire orina fittittoyyo.

¹¹Manni hara'mmat maham awwaadoobee'i bikkina at niina hara'mmitaa ni maso'inne orame.

¹²Waa'i niinninne maqiretti ihu bikkina nees kaa'nnoommo; ixxim ni maso'o hancaacamookko.