Read Hadiyya Mazmuu'l Kitaaba 63 Bible Online

Mazmuu'l Kitaaba 63 - Hadiyya bible

Mazmuu'l Kitaaba 63

¹Waa'a! At iina Moollanna; an keese wodaniisim ki'isaa hasaammo; wo'i bee'i gogaalli udma'i uullanne i foor keese xeebe'aakko; i maarim kees quluxaakko.

²Ee bikkina an ki Keesammi Minenne keese moo'aammo; ki malaayyee ki lombam moo'aammo.

³Ki eroommi fooriinsi lobane; ee bikkina an keese galaxxoommo.

⁴An foorinne hee'oommi doolli hundannem keese galaxxoommo; ki summinne i anga k'isoommo;

⁵Mat manchi er hurbaata itaa goddaa na'a mu'lloo'isam i foorim keesenne na'a mu'lloo'isam i suuminnem galaxxi mazmuura liiranchinne zammaroommo.

⁶Dakkanne iinse'ummisam keese tiiroommo; hiim hundoomam ki bikkina dabaransaa sawwoommo.

⁷At iina hara'mmaanchi ikki bikkina ki laxxi hafanne usheexxaa liiranchinne zammaroommo.

⁸An keesenne xaxamoommo; ki makki angim eese bakkiisaa amadookko.

⁹Ihukkaarem eese shiteena hassam keen leto'i manni hee'llam beyyo dillitamo.

¹⁰Ixxuwwi bisa'inne letamo; ixxuwwi leesham wengereelli itookko.

¹¹Waa'i kaachcha uwwu bikkina adil Waa'anne liiramookko; Waa'i summanne hide'llam keen hundim liirantamo; ihukkaarem qophphanaa'nnek suum ifiisamookko.