Read Hadiyya Mazmuu'l Kitaaba 64 Bible Online

Mazmuu'l Kitaaba 64 - Hadiyya bible

Mazmuu'l Kitaaba 64

¹Waa'a! An hawwonne yoommi bikkina i uunxato macceese; i diina'i sha'llanchiinsim eese gatise.

²Jora baxxam keen maaxaqqanne dollottam dollotiinsi eese maaxe; boqqi kee'n dummichchiinsim eese daphphaa'e.

³Ixxuwwika allabo bisa'isa qareesso'ookko; ixxuww suumiinsi firoo jor wocam xiyyisa chokkotto'ookko.

⁴Maaxanta'a xummaanchi mancho qassamo; badditoo'nnim dangonne qassamo.

⁵Ee jora baxxam sawwite a'llantu'uuyyi qoxxixxantamo; ixxuwwim qaasha qaashshamisa a'llantamo; odim «Neese ayyim siidukkoyyo» yitamo.

⁶Ixxuwwim jor sawwite sawwita'a lasage «Nees issinummi hantaar ayyim la'oobee'ane» yitamo; oohim mannik wodanii tiirii hantaarinne wo'mmaakkoohan ihukkisa moo'isoohane.

⁷Ihukkaarem Waa'i ixxi xiyyinne ixxuwwa qasookko; ixxuwwim dangonnem qassantamo.

⁸Ixxuwwi wocco'i woshshinnem ixxuwwa bi'isookko; ixxuwwa moo'llo'i keen hundim maalalta'a horoore heekkeessamo.

⁹Ee lasage manni hundim baddookko; Waa'i issu luwwi hundam kurookko; Waa'i issu luwwi hundam sawwookko.

¹⁰Muccur manni Waa'i issu luwwanne liiramookko; ixxonnem yabo aagookko; xummaan hundim ixxo galaxxona.