Read Hadiyya Mazmuu'l Kitaaba 65 Bible Online

Mazmuu'l Kitaaba 65 - Hadiyya bible

Mazmuu'l Kitaaba 65

¹Waa'a! Kiina Xiyoo'n duunanne galat hasisookko; kiina aangummi uga'am wonshinoommo.

²At mannika uunxato macceessoo bikkina Manni hundim ki beyyo waarookko.

³Baaxiil neese xuuxaa hee'ukko; ihukkaarem at ni bi'ishshi hundam haafitto.

⁴At doo'llitaa ki minenne hee'llamisina ki kollonne hincaa'llitti keen maassaammuwwa; kiihaannonne Keesammi Minenne yoo er luwwiinsi neese goddinoommo.

⁵Neese gatisaanchi ni Waa'a! Muccur ihaakkoo maalalisiisoo ki baxinne ni uunxato dabare; at uulli hundinaa dambalaqinaa neeyyata.

⁶At duunnuwwa ki malaayyinne qooccitto; ki malaayyem lade'llitto.

⁷At dambalaqquwwi gugaa wo'i moo'l sagaraa sa'issitto; minaadaphphi corochcham cawwoo'isa issitto.

⁸Uullanne hee'oo minaadab hundim at issitti maalalsiisoo luwwa moo'aa keese baddookko; at daraa maaro'oo liiranchi mazmuura uwwitootto.

⁹Xeena ga'nnisimminne uulla abooyyitootto; misha uwwoo'isina harishissootto; daajjuwwam wo'inne wonshitootto; uulli hurbaata mannina uwwoo'isa issitootto; ee'isa ihoo'isina issittok atette.

¹⁰Abuullamu uullinam lobakat xeena uwwitootto; ga'nnoo xeeninnem aashissootto; xee'n kifinnem buchcha qufissootto; mutu luwwam maasse'lloo'tto.

¹¹Maarage ki maaddinne wonshitootto; uulli hundam goddissootto.

¹²Udma'i uullim fooraam diinatinne wo'mmookko; duunnuwwim liirancha eddechchisa edde'ookko.

¹³Allaachchi biirim dut gereebbinne wo'mmookko; lete'i cebbim wix hurbaatinne wo'mmookko; ixxuwwim liiranta'a shuttu'uuyyi zammattamo; hundim liiranta'a ilillaatinne zammattamo.