Read Hadiyya Mazmuu'l Kitaaba 66 Bible Online

Mazmuu'l Kitaaba 66 - Hadiyya bible

Mazmuu'l Kitaaba 66

¹Uulli hundim Waa'ina ilil yihona.

²Ixxi summi lombina zammallehe; ixxenam lombaam galata uwwehe.

³Ki'nnuwwim Waa'ina «At baxxi bax hinkaa'nna maalalsiisoohane; ki malaayyi hundiinsi loban ihu bikkina ki diina'i ki illagenne musmusookko.

⁴Uullanne yoo minaadab hundim kiina otossookko; galaxxi mazmuuram zammarookko; ki summam lonsukkuuyyi zammarookko» yi'llehe.

⁵Waa'i baxu baxo hundam waattakka'a moo'llehe; ixxi manni lambe'enne maalalsiisoo baxo baxaakko.

⁶Ixxi dambalaqa gogaalli uulli issaakko; ixxuwwim daajje lokkinne fitto'o; neesem ixxi issu luwwanne liirammaammo.

⁷Ixxi malaayyinne heer heerinam gassookko; ixxi illi minaadab hundam moo'ookko; ee bikkina boqquwwi gaga iimiimaa'lloone.

⁸Minaadab hundichchim ni Waa'a lonsehe; Ki'nnuwwi sagaram iimaa'llakka'a galaxxehe.

⁹Neese foorinne hee'isookkok nees umboombee'isam egerookkok ixxotte.

¹⁰Waa'a! At neese keentaatto; bira giirinne muccussakkamisam neese muccussitaatto.

¹¹Neese qaashanne aangissitto; kee'mmaalli iyyom neesenne iyyiissitto.

¹²Ni diina'i neese hancaacantamisa issitto; neesem gii'l lambe'innee wo'i lambe'innee hingummo; ihukkaarem ee beyyiinsi fissitaa kaba neese usheexxat yoo beyyo wottitto.

¹³Shokkiisakka'a hincaa'akkam kitima ki mine amadaa waaroommo; kiinam aagummi uga'a uwwoommo.

¹⁴An hawwonne aagummi ammane uwwoommo yaa i suuminne aagummi uga'a kiina uwwoommo.

¹⁵Shokkiisakka'a hincaa'akkam di'ir kitma kiina hincaa'oommo; gereebbi ambulluwwa kiina shi'nnoo kitim issaa hincaa'oommo; moolluwwaa fella'aa kiina kitim issaa uwwoommo; eehanni shi'nnim iimane firookko.

¹⁶Waa'i iina issu luwwi hundam kuroommo; Waa'a badditakkam keen hundim waattakka'a maccessehe.

¹⁷An ixxi kollonne laarummo; anim ixxo i suuminne galaxxoommo.

¹⁸I tiironne baaxiilo tashaa cawwaammoota'n I Moollanni i uunxato macceesam hee'ukkoyyo.

¹⁹Ihukkaarem Waa'i kaba hanqo'isam macceesaakko; i uunxaxxi sagaram macceesaakko.

²⁰I uunxato sabubee'i bikkina ixxi eroommam iinniinsi qeessubee'i bikkina Waa'i galaxxamaakkoohan ihona.