Read Hadiyya Mazmuu'l Kitaaba 68 Bible Online

Mazmuu'l Kitaaba 68 - Hadiyya bible

Mazmuu'l Kitaaba 68

¹Waa'i ki'ona; ixxi diina'im binnihona; ixxo sabo keen ixxi illagiinsi gibona.

²Ixxuwwi wiriir binnoo'isa binnitona; maraphphi chuf giiranne bukkamoo'isam jor keen Waa'i illagiinsi bi'llona.

³Ihukkaarem muccur keen liirantona; Waa'i illagenne lobakata liirantona; lobakat liiranchinnem «Illil» yitona.

⁴Waa'ina zammallehe; ixxi summi bikkinam galaxxi mazmuura hincaa'llehe; duuphphi haninne marookkoka iimiimmaa'llehe; ixxi summim Waa'a! Ixxi illagennem lobakata liirammehe.

⁵Waa'i ixxi Keesammi Minenne ihaa; adaraar oosina anna; busar meentikam hanqa egeraancho.

⁶Mulli hee'oo keenina mine uwwookko; karanto'i keeno ixxi wodinne tirookko; ihukkaaren jor keen udma'anne hee'llamo.

⁷Waa'a! Ki minaadaba awwonsitti ammane udma'i uullanne ixxuwwinne maqire mattitti ammane

⁸Siina'i Moollanni Waa'i illagenne Isra'ee'l Moollanni Waa'i illagenne uulli huxe'ukko; iimaniinsim xeen ga'nnukko.

⁹Waa'a! Lobakat xeena ga'nnisitto; gogaakkoo ki ullam aashissitto.

¹⁰Oo beyyi ki allaachchi diinat hee'oohan ihukko; buxinam ki biijoominne hasisoo luwwa uwwitto.

¹¹Waa'i ixxi ijaajo uwwukko; alallaatoo gogotim duta.

¹²Ixxuwwim «Gogoxxi adilluwwi gaaggaabba'a gibbamo; minenne gatu meentim qeefajja baxxamookko.

¹³Gereebba allaatteena laso gatto'i keenim; lad kin birinne baxamaa; belelleeso worqinnem goolabamu; handare'i laxxisa ikkakkamo.

¹⁴Hundam xanoo Waa'i adilluwwa binnaa'u ammane Xalmoo'n Duunanne ga'nnoo baraxxisa issukko.

¹⁵Ate qoxxaalli Duuna! Baasaa'n Duuna! dut aagammi firammi duuna; Baasaa'n duuna;

¹⁶ki'nnuwwi dut aagammi firammi duunnuwwa; Waa'i hee'eena hasaa doo'llu duuna Waa'i heer heerinam hee'oo duuna mahina to'achchimminne moo'llakkamuulla?

¹⁷Waa'ik faraxxi gaare'uwwi kumaa kaakumaa; Waa'i Siina'i Duuniinsi keesammi ixxi mine aagukko.

¹⁸At iimane fittitti ammane qeefadamu keeno amaddaa mattitto. Moollanni Waa'a! At hee'lloo beyyonne ikkaa jor keeniinsi gatoo'n manni hundiinsim gibiro aa'llitto.

¹⁹Balli hundam ni iyyo iyyookkok; ni gatisaanchi Moollanni Waa'i galaxxamona.

²⁰Ni Waa'i gatisaanchi Waa'a; lehiinsi gatiseena xanookkokim xale'i Moollanni Waa'a.

²¹Hanqinam Waa'i ixxi diina'ika horoore baaxiilonne qoxxita'a hee'llam kee'nnekam sammo aphphisookko» yitamo.

²²Waa'i «Ki diina'a Baasaa'n Duuniinsi dilliisoommo; xilli dambalaqiinsem fissaa woroommo.

²³Atim ixxuwwika xiiga lokkinne hancaaccootto; hancaacciittuuyyi taakke'llootto; ki wishim ki diina'a itookko» yukko.

²⁴Waa'a! Ki lombaam moo'amoolla; oohim i Moollanni i adil keesammi ixxi mine lombinne aagoohane.

²⁵Zammaraan illaginne mazmuu'l mu'uta lellitam keenim lasinne ikka'a dibbe'e aphphissam landi odim lambe'enne hee'llo'o.

²⁶Ixxuwwim «Minaadaphphi wixxixxi lambe'enne Waa'a galaxxehe; Isra'ee'l shumo'i hundim Waa'a galaxxehe» yitamo.

²⁷Hoffan hee'u Biiniyaam sulli awwonsam hee'ukko; ee lasage xig dut Yihuxxi gassaan ixxuwwi gogotinnem hee'llo'o; lasaanchonne Zaabiloonikii sulli awwonsaanii Neeftaaleem sulli awwonsaanii awwonto'o.

²⁸Waa'a! Ki woda moo'ise; Moollanna! Ka illageen niina issittisam kabadem ki malaayye moo'ise.

²⁹Yerusaaleemanne yoo ki mi'n bikkina adilluwwi kiina irifo'o amadda'a waattamo.

³⁰Shomboqo'i wo'l moochcha, minaadaphphi lambe'enne yoo moolluwwa gorba'innem axeere. Ixxuwwi hundim ijaajanta'a kiina gibittamisa isse; ora ki'isseena hassam minaadabam binnaa'e.

³¹Gassaan Gibxiinsi waarookko; Tophphe'i uulli minaadabim Waa'i kollonne anga biddiqaa'ookko.

³²Uulli adilluwwi hundim Waa'ina zammallehe; Moollannina zammallehe.

³³Hinaxxi doolliinsim ki'isaa yoo iima'n iima'n iimane firukkaanina wodaam sagarinne gugoohaannina zammallehe.

³⁴Hibbi Isra'eelanne, malaayyim iimanennette ihu Waa'ina «At wodaammo» yi'llehe.

³⁵Isra'ee'l Moollanni Waa'i ixxi Keesammi Minenne ihaakka ixxi miniinsi moo'amoo ammane lobakata baddisookko; Isra'ee'l Moollanni Waa'i ixxi minaadabina wodaa malaayyee uwwookko; Waa'i galaxxamaakkoohan ihona.