Read Hadiyya Mazmuu'l Kitaaba 69 Bible Online

Mazmuu'l Kitaaba 69 - Hadiyya bible

Mazmuu'l Kitaaba 69

¹Wo'i wo'mmaa i gaanje afu bikkina Waa'a! At eese gatise.

²Uulloommi beyyo hoogaamma xilli leepho'onne xuuxamaammo; xilli wo'onne aagaammo; wo'i moorim eese xuuxaakko.

³An laaraa laaraa hoogaammo; i leella'im gogaakko; i Waa'a egerimminne i illi jaamaakko.

⁴Mashka'i bee'em eese saboo keen i horoo'l saraatiinsi dutaakko; jollinne eese hollansoo diina'i ki'aakko; ee ammane an game'umbee'i luwwaa iinniinsi miqisso'o; odim an game'ummibee'i luwwam miqisseena giddissamuulla.

⁵I Waa'a! I qawwooma at laqqootto; i baaxiilim kiinniinsi daphphaakkoohaneyyo.

⁶Gogoxxi Moollanni Waa'a! Keesenne neeyyato issitam keen i mashka'inne tuuttoone; Isra'ee'l Moollanna! Keese hassam kee i mashka'inne sho'lloone.

⁷Ki mashka'inne game'llato iyyaqqaammo; Anim tuulle gunguu'llaammo.

⁸Iyyabbaayyuwwina allaggisa iyyummi oosinam waaraanchisa ihaammo.

⁹Ki mi'n to'achchi eese itaakko; keese game'llakko'i game'llatim eesenne ihaakko.

¹⁰Soommanimminne i gaga hawwodummi bikkina eese game'llakko'o.

¹¹An xiddi eddechcha edde'ummaare eesenne osarakko'o.

¹²Wixxixxi beyyonne afuuroo mannina wossa dimbaanim lelli ihaammo.

¹³Waa'a! Ihukkaarem an at doo'llitti ammanenne keese uunxoommo; Mollanna, lophphaakkoo ki eroomminne; hanqo'i ki gatishshinnem macceese.

¹⁴Eese leepho'i xuuxoobee'isa gatise; i diina'iinsii xuuxoo xilli wo'iinsii eese gatise.

¹⁵Dirs eese agoone; xilli wo'im eese xuuxoone; bar tigaa eese lummaa'oone.

¹⁶Waa'a! Ki eroommi iina danaam ihu bikkina macceese; ki qishixxat lobakat ihu bikkina i kollonne daba'lle.

¹⁷Iinniinsi ki awwaadaanchiinsi ki gaga maaxxitte; an u'nnanne yoommi bikkina; qaqqissaa i uunxato macceese.

¹⁸I kollonne hincitaa iina at agaage; i diina'iinsim eese gatise.

¹⁹Eesenne afu game'llato, tuullaa sholle'nnaa at laqqootto; i diina'a annannichchom laqqootto.

²⁰Ixxuwwi game'llat i wodano iiqu bikkina an neeyyato murummo; i kichchechcha baxxamoo mancho hasummo; ihukkaarem matom siidummoyyo; eese qoxxisookkokam hasummo; ihukkaarem matom hoogummo.

²¹Itoommi hurbaatanne qaraaroo luwwa hamaatto'o; xeebe'ummaarem shiishoo agga agisso'o.

²²Ixxuwwi maaddi ixxuwwina qaasha, qolatoo bichchaa ihona.

²³Moo'llambee'isa ixxuwwik illi qooqona; ixxuwwi afarim hundi ammanem quutona.

²⁴Ki bala'a ixxuwwanne ubbuuse; ki quunqi boobanim ixxuwwanne dillona.

²⁵Ixxuwwi gatti diihona; ixxuwwi minenneewwannem hee'oo manni siidamoone.

²⁶At guzumo'l keeno ixxuwwi yaayyitamuulla; at omassiiti keenom ixxuwwi baasissamuulla.

²⁷Ixxuwwi hawwojjanne hawwojja ede; kiinniinsi muccurooma siiddoone

²⁸Heechchi kitaabiinsi ixxuwwi shiinshantona; muccur keeninnem kitaabantoone.

²⁹Ihukkaarem an u'nnannee hawwonnettee; Waa'a! Ki gatisimmi eese bakkiisona.

³⁰Waa'ika summa mazmuurinne galaxxoommo; galatinnem ixxo imiimaa'oommo.

³¹Ookkim moora te'im labeena; kitimimmiinsi loboka Waa'a liiransookko.

³²Wor amadanto'i keenim eekka moo'lla'a liirantamo; Waa'a hassakkam kee'nnekim wodan liiramona.

³³Waa'i hawwaan kee'nneka laachcha macceesaakko; karaxxi minenne yo'i ixxi minaadabam gadaa urukkoyyo.

³⁴Iiman, uulli, dambalaqquwwii woronne mikmikoo luwwii hundim Waa'a galaxxona.

³⁵Waa'i Xiyoona gatisookko; Yihuxxi beero'uwwam areesaa baxookko; ixxi minaadabim eekke'enne hee'ookko; lago aa'ookkome.

³⁶Ixxena awwaadoo kee'n shumo'i lago aa'ookko; ixxo summa iittoo keenim eekke'enne hee'ookko.