Read Hadiyya Mazmuu'l Kitaaba 7 Bible Online

Mazmuu'l Kitaaba 7 - Hadiyya bible

Mazmuu'l Kitaaba 7

¹I Moollanni Waa'a! An yabo aagoommok keesennette; eese laseesoo keen hundiinsim eese gatise.

²Eebeelas hobbisa iiqansitamo; ayyim gatisoobee'i beyyonnem dareeransitamo.

³I moollanni Waa'a! An ayyem hawwodaammoohan ihulas; i beshichchina eroommi bikkeenne jora issaammoolas; i diina'am mashka'i bee'em hawwodaammoohan ihulas; ka keeniinsi matoomam issaammoolas;

⁵i diina'i eese hollaa amadona; ifoorem buchchanne edaa hance'ona, i lombam buchchanne edona.

⁶Waa'a! Eesenne nadadda'a ki'llo'i keenonne at ki quunqinne ki'e. I Waa'a! Ki'e; hanqo'i oogato'om ijaaje.

⁷Minaadab hundim ki kululleetanne wixxihona; atim hanaan ikkaa ixxuwwa gasse.

⁸Waa'i manni hundannem oogatookko; Waa'a! I muccuroo'mmisinne iina oogate; i xummisinnem iina oogate.

⁹ Mannika sawwitee tiiroo saarayyitaa laqqoo muccur Waa'a! Boqqi kee'n hantaaro bi'ise; ihukkaarem muccur keen xumminne hee'llamisa isse.

¹⁰Xabbeen keeno gatisoo Waa'i iina agira.

¹¹Waa'i hanqo'i oogataancho; jor keenonne hundi ammanem oogatookko.

¹²Manni baaxiilo biiraa yaa daba'lloobee'an ihulas; waa'i ixxi bisa'a qareesookko; xiyyam chokkorookko.

¹³Ixxim qasaa shoo mu'uta axisaakko; belecce'oo xiyyuwwam gudisaakko.

¹⁴Baaxiilaan jor luwwa godabonne amadda'a hantaaro siitta'a qophphano qattamo.

¹⁵Mulli keenina bare hinookkok ixxi gagim ee barenne ubookko.

¹⁶Ixxi hantaar ixxonnem daba'llookko; ixxi boqqoomim ixxi horoorennem ihookko.

¹⁷Waa'i hanqo'an ihu bikkina an galaxxoommo; Hundiinsi Lob Waa'i summam mazmuurinne heebbisoommo.