Read Hadiyya Mazmuu'l Kitaaba 71 Bible Online

Mazmuu'l Kitaaba 71 - Hadiyya bible

Mazmuu'l Kitaaba 71

¹Waa'a! An keesenne yabo aagaammo; eese hore'em tuussiissitte.

²Ki muccuroominne eese agaagee gatisee; ki macce i kollonne dabare; eesem gatise.

³An hundi ammanem gibaa yabo aagoommi qoxxaalli kin ihe; at iina qoxxaalli kinaa girbaa ikki bikkina eese gatissoo'isina ki ijaaj firona.

⁴I Moollanna! Jor kee'n angiinsi eese gatise; mogaalluwwaanniinsii hantaaraa'n angiinsii eese gatise.

⁵I Moollanni Waa'a! An neeyyato issoommok keesennette; oosoommaniinsim ki'isaa amma'nnamoommok keesennette.

⁶Qaramummaanniisim ki'isaa an keesenne bakke'aammo; an qaramoommisa issittok atette; an hundi ammanem galaxxoommok keesette.

⁷An dut keenina maalallat ihummo; ihukkaarem at an yabo aagoommi qoxxaalli beyyo.

⁸An hundi ammanem ki lombaa hibbaa alallaatoommisina i suum galatinne wo'mmaakko.

⁹Lommanna'n doollenne at eese uunjititte; i malaayyi hoogoo ammanem eese uttitte.

¹⁰I diina'i a'llanto'ookko; eese shiteena hassam keenim mateeyyanne doollotto'ookko.

¹¹Ixxuwwim «Waa'i ixxo uunjaakko; ixxo gatisookkok bee'i bikkina hollitakka'a amaddehe» yitamuulla.

¹²Moollanna! At iinniinsi qee'llititte; i Waa'a! Iina hara'mmiteena gaaggaabe.

¹³Iinninne uullixxantam keen tuuttona; bi'lloname; eese hawwoddeena hassam keenim gadanchaa sholle'nnaa gunguu'llitona.

¹⁴Ihukkaarem an hundi ammanem keesenne neeyyato issoommo; keesem edaa edaa galaxxoommo.

¹⁵I suum ki muccurooma, hundi ammanem ki gatisimma wocoolla; kuraa guulleenam xanoommoyyo.

¹⁶Waaraa i Moollanni Waa'ika malaayyaam baxo alallaatoommo; xale'i ixxi muccuroomam kuroommo.

¹⁷Moollanna! Oosoommaniinsi ki'issaa eese losissaatto; kabad afeebe'em ki maalalsiisoo baxo alallaatoommo.

¹⁸Moollanna! An lomma'nnaa abo'oommi ammane eese uttitte; ki woda waaroo qaranchina ki malaayyem hanenne waaroo minaadabina la'iseembee'e at iinninne maqir ihe.

¹⁹Waa'a! Ki muccuroom iima'n libo'o afookko; at hundiinsi lob baxo baxxaatto; Waa'a! Keese labookkok ayyim bee'e.

²⁰Eesenne dut hawwii u'nnii afoo'isa issittaarem eese dabattaa foorinne hee'oommisa issitootto. Waammi woronne aagummaarem at eese bariinsi fissitootto.

²¹Iina eraa'llaanniinsi lomba eddaa uwwitootto; daba'llitaahim eese qoxxissootto.

²²I Waa'a! At amma'nnantaattoohan ikki bikkina an diitta'inne keese galaxxoommo; Isra'ee'l keesamma, an maasiinqo'inne kiina zammaroommo.

²³An kiina zammaroommi ammane i suum liiranchinne wo'mmookko; at gatissitti i foorim kiina ililookko.

²⁴An hawwodamimma hassam keen tuutto'ookko; sholle'llo'ookkome; ki muccuroo'm bikkinam i suum hundi ammanem wocookko.