Read Hadiyya Mazmuu'l Kitaaba 72 Bible Online

Mazmuu'l Kitaaba 72 - Hadiyya bible

Mazmuu'l Kitaaba 72

¹Waa'a! Hanqo'i oogato adilina ki muccuroomam adi'l beetina uwwe.

²Ixxi ki minaadabina muccuroominne wor amadanto'i ki minaadabinam hanqinne oogatookko.

³Lob duunnuwwi godda hoffi duunnuwwim muccuroo'm misha ki minaadabina uwwookko.

⁴Ixxi wor amadamu minaadabina fitamookko; bux oosom gatisookko; wor amadaanom iiqansookko.

⁵Ixxi eelliinchisaa aga'nnisaa heer heerinam hee'ookko.

⁶Ixxi hixe murakko'i beyyonne ga'nnoo xee'nnisaa uullanne yiroo xee'nnisaa ihona.

⁷Ixxi doollenne muccuroom wo'mmaakkoohan ihookko; agan hee'oo'isa ixxek xummi hee'ookko.

⁸Ixxi dambalaqiinsi dambalaq afeebe'e Efiraaxis daajjiinsi ki'isaa uulli tochchi afeebe'em gassookko.

⁹Udima'anne hee'oo keen[4] ixxena otossookko; ixxi diina'im buchcha itookko.

¹⁰Tarseesikii wo'inne kibbamu uulli adilluwwii gibiro eebbamo; Araphphekii Saaba'i uulli adilluwwim irfo'o uwwitamo.

¹¹Adilluwwi hundim ixxena otossitamo; minaadab hundim ixxena ijaajantamo.

¹²Wor amadamaa laaroo keeno, hawwaanoo hara'mmoo manni beekeenoo ixxi gatisookko.

¹³Ixxi buxinaa hawwaaninaa qishixxookko; hoongaanom lehiinsi gatisookko.

¹⁴Ee keeno wor amadanchiinsii damgiinsii gatsookko; ee kee'n xiig ixxi illagenne kee'mmaalla.

¹⁵Ixxek umur qeeraa'llona; Araphphi uulli worqim ixxena waarona; hundi ammanem ixxena Waa'a uunxakkona; balli hundam ixxo maasse'akkona.

¹⁶Uullanne hurbaat atootona; duunnuwwannem hurbaat wo'mmona; mish liibaanoos uulli duunnuwwisa henxereellona; beero'uwwannem hixisa dutona.

¹⁷Ixxi summi heer heerinam qoxxaa hee'ona; ixxi sadim eelliinchisa doolli hundinam hee'ona; minaadab hundim ixxenne maasse'amona; minaadab hundim at «Maassaamo» yihona.

¹⁸Mullam maalalsiisoo aganna baxoo Isra'ee'l Moollanni Waa'ina lombi ihona.

¹⁹Ixxek lombaam summi heer heerina galaxxamaakkoohan ihona; ixxi lombim uulli hundannem wo'mmona; Ameen, Ameen!

²⁰Isseyyi beet Daawiit uunxat ka beyyonne beeddukko.