Read Hadiyya Mazmuu'l Kitaaba 73 Bible Online

Mazmuu'l Kitaaba 73 - Hadiyya bible

Mazmuu'l Kitaaba 73

¹Wodan muccur ihu Israa're'l minaadabina Waa'i hinkido'i biijaalla.

²Ihukkaarem i lokki timtimukkuuyyi luxuunxaa ubeenaa iina hofqax gataakko.

³Oohim jor keenina makkukkisa moo'aahii amaadaanonnem to'achchaahii hee'ummi bikkinatte.

⁴Ixxuwwanne jabbi mahim bee'i bikkina ixxuwwi fayya'uwwaa makkixxito'oo keenoo.

⁵Mulli manni u'nnantamisa ixxuwwi u'nnantamoyyo; mulli kee'nnisam hawwitamoyyo.

⁶Ee bikkina ixxuwwi amaada gaanji wereeggisa boqqoomam eddechchisa edde'llo'ookko.

⁷Di'iraakkoo ixxuwwi illi qanqanqoohane; ixxuwwi wodan jor sawwitinne wo'mmaakkoohane.

⁸Ixxuwwi mannanne naaccamoo xale'i jolle woccamoo; gaga iimiimaa'llu'uuyyim mulli keeno hawwoddeena shattamo.

⁹Ixxuwwi Waa'anne ejjebbettamo; ixxuwwi allabinnem uulli hundam affamo.

¹⁰Ee bikkina Waa'i minaadab ixxuwwi kollonne tiiro dabarookko; ixxuwwi woshsha hundam cawwita'a aa'llamo.

¹¹Ixxuwwim «Waa'i maha la'ookko? Hundam xanookkokdu lachchaamonnihe?» yitamo.

¹²Jor kee'nnek haalat eehane; ixxuwwi hundi ammanem do'ixbeekeeno; ixxuwwi amaxxim exxukkuuyyi maroo keeno.

¹³Eehaare an i wodano muccuroominne egerummok kora'atteme; i anga muccuroominne aanshaqqummokim kora'atteme.

¹⁴An balli hundam hawwummo; soodu soodanni hundam guzumo'amummo.

¹⁵An eehid wocaammoohan ihuta'n ki minaadabina amma'nnamaammoohan iham hee'ummoyyo.

¹⁶An eekka la'eena hasummo; ihukkaarem ookki lobakata kee'mmaalli ihaa moo'amukko.

¹⁷Oohim Waa'i mine aageembee'e hee'ukko; ihukkaarem Waa'i mine aagaa lasage ixxuwwika lasaancho la'ummo.

¹⁸Hanqinam at ixxuwwa luxuunxisoo beyyonne dissitto; ubba'a bi'llamisam issitto.

¹⁹Hinkid ilcilimmaaxxi qaxanne bi'llo'o! Dangonnem beeddito'o.

²⁰Diriiriinsi baqakkam ammane bi'oo haqaawwisa Moollanna, at ki'lloo ammane ixxuwwa awwaadbee'i keen issitaa bi'issootto.

²¹Iina qaraaru ammane i tiir kichche'u ammane

²²I Moollanna, an ki illagenne saayyiinsi ee'lloombee'i maham la'oombee'i qawwi ihummo.

²³Ihukkaarem an hundi ammanem kiinninnette; atim i makki anga amaddaatto.

²⁴Ki sogitaninne eese awwonsitto; lasaanchonnem ki lombanne aagissootto.

²⁵Iimanenne iina kiinniinsi bagaan ayyi yookko? Ka uullannem kiinniinsi mulleka hasoommi luwwi bee'e.

²⁶I maarii i sawwitii hoogeena xanookko; ihukkaarem Waa'i iina malaayye; heer heerinam ixxi iina sharada.

²⁷Kiinniinsi qee'llitam keen bi'llamo; kiina amma'nnantambee'i keeno hundam at bi'issootto.

²⁸Ihukkaarem iina Waa'i kolli hincimmi e'llookko. Ixxi bax bikkina hundinam alallaateena an yabo aagoommok Moollanni Waa'annette.