Read Hadiyya Mazmuu'l Kitaaba 74 Bible Online

Mazmuu'l Kitaaba 74 - Hadiyya bible

Mazmuu'l Kitaaba 74

¹Waa'a! Neese heer heerina uunjittok mahinatte? Ki allaachchi gereebbandu kaa'nna quuqqittok mahinatte?

²Gaassiinsim ki'issaa at doo'llitti ki minaadaba, tisso miqqaa ki gaqqan issitti ki sulloo at hee'lloo Xiyoo'n duunaa sawwihe.

³Ki minenne yoo luwwi hundam diina'i bi'isu bikkina ee gindamaa diihu luwwa hundam moo'e.

⁴Ki diina'i ki minenne diraantamuulla; ixxuwwi baandiram mare'i ihona ee beyyonne kaasso'ookko.

⁵Ixxuwwim doo'm woroonne heedinne haqqa bachchoo manna labbamuulla.

⁶Angi lachchi manninne wereeggu luwwi hundam heedinnee fanxiisinnee iiqansito'o.

⁷Ki mine giirinne shokkiisso'o; ki summi weeshamoo beyyom haashaassito'o.

⁸Ixxuwwim «Ixxuwwa wor amandoommo» yito'o. Ka uullanne Waa'ina otossakkam beyyuwwa hundam shokkiisso'o.

⁹Niina moo'amoo mare'i bee'e; ka lasage hiraagoo hiraagaan matim bee'e; kuk hinkaa'n ammanina ihooda'e la'ookkokim ni lambe'enne bee'e.

¹⁰Waa'a! Diina'i naacoo hinkaa'n ballinatte? Ki maso'i ki summa sholliissamok hundi ammanemennihe?

¹¹At ixxuwwa mahina guzumo'llooyyo? Ki anga mahina wixxaa'llaa cawwitto?

¹²Waa'a! At gassiinsem ki'issaa iina adila; ki gatisimmim uullanne ihukko.

¹³Ki wodinne dambalaqa baxxansitto; dambalaq woro'l moochchika horoolluwwa iiqqitto.

¹⁴Leewaataan yakkam xarakkichchi horoolluwwa iiqqittok atette; ixxom udma'anne hee'oo qooccanchuwwinam[5] hurbaat issitto.

¹⁵Bu'uuwwii wo'uuwwii firoo'isa issittok atette; xoo'oobee'i daajjuwwam gokkissitto.

¹⁶Ballii hiimii kiihane; eelliinchoo aganaa beeyyo beyyonnem dissittto.

¹⁷Uullika gabala qooddittok atette; at billee hagayyee qooccitto.

¹⁸Waa'a! Diina'i keesenne hinkaa'nna naacamoolda'e awwaadbee'i minaadabim ki summa hinkaa'nna sholliisoolda'e sawwihe.

¹⁹Ki minaadaba moochchina higissaa uwwititte; hawwonne yoo ki minaadaba heer heerinam xadditte.

²⁰Lolli tunsi uullanne hundannem wo'mmaakkoo bikkina ki hidi'l sagara sawwihe.

²¹Wor amadanto'i keen tuutta'a laso daba'llitamisa issititte; buxii hawwaanii ki summa galaxxitona.

²²Waa'a! Ki'e; ki baado fire; awwaadbee'i keen hundi ammanem keesenne naacco'okam sawwihe.

²³Ki diina'ika diraanchaa hundi ammanem sha'llantam sha'llanchaa xadditte.