Read Hadiyya Mazmuu'l Kitaaba 77 Bible Online

Mazmuu'l Kitaaba 77 - Hadiyya bible

Mazmuu'l Kitaaba 77

¹An sagara iimaa'aa Waa'i kollonne laarummo; i laachchi sagaram Waa'ina macceesisummo.

²Eesenne hawwi afu balla Waa'a hasummo; hiimom usheexxoo'n i anga biddiqaa'ummo; ihukkaarem an kichchechchiinsi qoxxeena xanummoyyo.

³Waa'a, an keese sawwummo; i woronnem qitinummo; dabaransaahim sawwummo; i wodanim hoogukko.

⁴An diriiroombee'isa issitto; lobakata kichche'ummi bikkinam woceena xanummoyyo.

⁵An gaassi doolle sawwummo; hinaxxi doolluwwam dabaransaa sawwummo.

⁶Hiim hundoomam garoommok sawwummuuyyatte; dabaransaa sawwummuuyyim i woronne

⁷«Waa'i heer heerinam uunjoohonnihe? Ka lasagdu eroomma isseenayyonnihe?

⁸Heer heerina hee'oo ixxi eroommi beeddaahinnihe? wocu neeyyatdu hore'em gindamaahinnihe?

⁹Waa'i ixxeka hafite xadukkonnihe? Te'im ixxi quunqi mashka'inne qishixximma urukkonnihe?» yaa fitamummo.

¹⁰An «Hundam xanoohaanni gatisimmi makki angi dabassamukkaannisa sawwimmi ookki i qacine» yummo.

¹¹Waa'i baxu baxo sawwoommo; gaassi agannuwwam sawwoommo.

¹²At baxxitti bax hundam sawwoommo; maalalsiisoo ki bax hundam dabaransaa sawwoommo.

¹³Waa'a! Ki goog keesamma; ni Waa'nnoo hundiinsi lob Waa'i bee'e.

¹⁴Aganna baxxoo Waa'i atette; at minaadaphphi lambee'enne ki malaayye moo'issootto.

¹⁵Yaaqoobikaa Yooseefikaa shumo'o ki minaadaba ki malaayyinne gatissaatto.

¹⁶Waa'a, wo'i keese moo'ukko; wo'i keese moo'aa baddukko; xilli dambalaqquwwim huxe'amukko.

¹⁷Duubim xeena ga'nnisukko; iimanim gugukko; ki xiyyuwwim belecce'ukko.

¹⁸Ki gug hambu'llaminne macceesamukko; banqi heer uullanne belecce'ukko; uulli heekke'amukko; huxe'ukkome.

¹⁹Dambalaq worinne kiina goog yookko; malaayyaam dambalaqam huruuttaa higgootto; ihukkaarem ki konte'i hore'em siidamooyyo.

²⁰At Muse'ennee Aarooninnee ikkaa ki minaadaba gerebbisa awwonsitto.