Read Hadiyya Mazmuu'l Kitaaba 78 Bible Online

Mazmuu'l Kitaaba 78 - Hadiyya bible

Mazmuu'l Kitaaba 78

¹I minaadaba, i losano macceessehe; i saga'l kollonnem ki'nnuwwi macce daballehe.

²I suume kobi'llishsha wocimminne fooqaa'oommo; gaassiinsim ki'isaa yoo maaxammi luwwam wocoommo.

³Oohim neese macceensummanee lanqummanee; niyyanno'im niina kurukkane.

⁴Neesem eekka ni oosiinsi maanxoommoyyo; Waa'ika galata, wodaa ixxi issu malalsiisoo baxoo waaroo qaranchinam kulloommo.

⁵Ixxi Yaaqoobina ijaajo uwwukko; Isra'eelinam seera alallaatukko. Eeham ixxuwwi oosina losissona niyyanno'o ijaajukko.

⁶Oohim lasaqqi qaranchi la'oo'isinatte; odim ixxuwwi hanenne waaro qaranchina losissonatte.

⁷Ee'isinne ixxuwwim Waa'anne neeyyato issitamo; ixxi issu luwwam xaddamoyyo; ixxi ijaajom egettamo.

⁸Ixxuwwim gaassi ixxuwwi anno'isam boqquwwaa ijaajantambee'i keenoo, ixxuwwik wodan Waa'anne qoxxoo'nnookeenoo amma'ntambee'i qaranchaa ikkamoyyo.

⁹Efireem oos gaadaanoo xiyya tokkossam keenoo ikko'aarem o'l ayyaamonne laso daba'llita'a gibbo'o.

¹⁰Waa'inne aaggo'i hidirom egetto'oyyo; ixxi seerinam ijaajancha sabbo'o.

¹¹Ixxuwwina baxu baxoo moo'isu maalalsiisoo agannaa xaddo'o.

¹²Gibxi uullanne Xoo'aananne ixxuwwi anno'i moo'llu'uuyyam aganna baxukko.

¹³Ixxi dambalaqa lam issa ixxuwwa higisukko; wo'om gortannisa uulloo'isa issukko.

¹⁴Ballaa duubinne hiimoo gii'l caakkinne awwonsukko.

¹⁵Udima'anne qoxxaalli kina diqukko; dambalaq qax wo'om fissa ixxuwwina agsukko.

¹⁶Ee kiniinsim wo'i firoo'isa issukko; wo'im daajjisa daadoo'isa issukko.

¹⁷Ihukkaarem ixxuwwi hundam xanoo Waa'ina boqqito'o; udma'i uullannem baaxiilo edda'a edda'a baxxo'o.

¹⁸Ixxuwwi lobakata mixxo'i hurbaata xa'mmimminne Waa'a keento'o.

¹⁹Ixxuwwim «Waa'i udma'anne maadda gudiseena xanoohonnihe?

²⁰Qoxxaalli kina diqukkaare wo'i firaa daajjuwwi daadaakko; eehaare hurbaatam uwweena xanoohonnihe? Maardu ixxi minaadabina uwweena xanoohonnihe?» yitu'uuyyi Waa'anne qunquunto'o.

²¹Waa'im eekka macceesaa lobakata quuqukko; ixxi giir Yaaqoob shumo'onne ixxi quunqim Isra'ee'l minaadabanne aphphukko.

²²Mashka'oomim ixxuwwi Waa'anne amma'nnito'oyyo; ixxi gatisimmannem neeyyata issito'oyyo.

²³Ihukkaarem ixxi hanaan duubbuwwa ijaajukko; iima'n gooccuwwam fooqaa'ukko.

²⁴Ittamisinam iimaniinsi maanna'a ga'nnisukko; iima'n hurbaatam ixxuwwina uwwukko.

²⁵Ee'isinne manni iiam'n asse'amaa'n hurbaata itukko; itta'a goddita'a gatoo qax hurbaatam uwwukko.

²⁶Waa'i eelliinchi firoo kolli hafachchi hafachchoo'isa issukko; ixxi malaayyinnem woroo'n qa'l hafachcha heekkeesukko.

²⁷Maara uulli buchchi qaxa bararoo cii'am dambalaq shashsha'l qaxa ga'nnisukko.

²⁸Eeham ixxuwwi wiiddanta'a yo'i dukkaannuwwi kululleetanne dilliisukko.

²⁹Ixxuwwi lobakata mixxo'i luwwa uwwu bikkina itta'a goddito'o.

³⁰Ihukkaarem mixxo'oka itta'a namu'llitoo'nnim hurbaat ixxuwwi suumenne hee'ukkuuyyim

³¹Waa'ik quunqi ixxuwwanne dillukko; ixxuwwiinsim la'antoo'oo geedduwwa shukko; Isra'ee'l woraaxxekam umura gundisukko.

³²Oo hundim ihukkaarem minaadab baaxiilo baximma utto'oyyo; maalalsiisoo agannuwwa baxukkaarem amma'nnito'oyyo.

³³Ee bikkina ixxuwwi doolli awwaad bee'isinne umurim baachchinne beeddoo'isa issukko.

³⁴Ixxuwwika mat qaxa shoo ammane wodaninnem hassa'a Waa'i kolli daba'llitam hee'llo'o.

³⁵Waa'i joriinsi egeroohaannoomaa hundam xanoo Waa'im ixxuwwina gatisaanchi ihukkisaa tiittam he'llo'o.

³⁶Ihukkaarem ixxuwwi suum xale'inne qawwisso'o; ixxuwwi allabinnem Waa'anne qophphanto'o.

³⁷Ixxuwwik wodan ixxonne qoxxaakkoohaneyyo; ixxenne aaggo'i hidirinam amma'nnanto'oyyo.

³⁸Ihukkaarem Waa'i ixxuwwina qishixxukko; ixxuwwi baaxiil hundam haafukko; ixxuwwam bi'isukkoyyo; dut ammanem ixxi quunqa iyyaqqukko; ixxi quunqi bala'am ixxuwwanne dilliisukkoyyo.

³⁹Ixxuwwi higoo hafachchisaa letam keenoo ikko'isam sawwukko.

⁴⁰Udma'i uullanne hee'llu'uuyyi ixxonne bangujjito'o; dut ammanem ixxo kichche'isso'o.

⁴¹Ixxuwwi edda'a edda'a Waa'a keento'o; Isra'ee'l keesammam quuqisso'o.

⁴²Ixxuwwa diina'iinsi gatisu ballaa ee ixxi wodaa tiitto'oyyo.

⁴³Gibxi moo'isu agannaam mare'e Xoo'aananne baxu maalalsiisoo baxom xaddo'o.

⁴⁴Ixxuwwika daajjuwwa xiiganne dabarukko; ee bikkina daajjuwwiinsi wo'o aggeena xanto'oyyo.

⁴⁵Tikaayyi gogota asse'ukko; ixxuwwam qasukko. Lugam asse'aa manna guullukko.

⁴⁶Hurbaaxxi muta kochcha'nnina atootam qawwaawwina uwwukko.

⁴⁷Ixxuwwika woyi'n kaashsha baradinne, oda'i misham hadaddinne bi'isukko.

⁴⁸Fooraam diinate baradinne; amaxxa hundam banqinne guullukko.

⁴⁹Ixxeka malaayyaam quunqa, bala'a, kee'mmaalli hawwoo boobanaa ixxuwwanne dillisukko. Bi'isoo asse'amaa'n gogotam asse'ukko.

⁵⁰Ixxi quunqina googo gudisukko; ixxuwwa lehiinsi gatisukkoyyo; ihukkaarem boobanina higisaa uwwukko.

⁵¹Gibxi uulli wona hundam shukko; Woraadda'n luxxi misha hundam Kaam dukkaananne guullukko.

⁵²Ihukkaarem ixxi minaadaba gereebbisa allaarukko; udma'annem allaachchi diinaxxisa awwonsukko.

⁵³Ixxuwwa xumminne awwonsukko; ee bikkina ixxuwwi baddito'oyyo; ihukkaarem ixxuwwi diina'a dambalaq xuuxukko.

⁵⁴Ixxuwwam keesammi uulla malaayyinnem kaa'aa amadu ee duunaam uulla worukko.

⁵⁵Mulli minaadaba ixxuwwi illagiinsi hollukko; ee ullam lagaa'llona baxxansukko; Isra'ee'l oosom ixxuwwi diina'i minneewwanne hee'llamisa issukko.

⁵⁶Ihukkaarem ixxuwwi hundam xanoo Waa'a keento'o; ixxom quuqisso'o; ixxi seeram egetto'oyyo.

⁵⁷Ixxuwwim ixxuwwi anno'isam laso daba'llita'a laggam keen ikko'o; boqqi xiyyisam inciicanto'o.

⁵⁸Otossakkam beyyuwwa baximminne Waa'a quuqisso'o; anginne baxamu qophpha'n waa'uuwwinnem ixxo tu'achchisso'o.

⁵⁹Waa'i eekka moo'aa lobakata quuqukko; Isra'eelam hore'em sabukko.

⁶⁰Manni lambe'enne kaasu dukkaana ixxi heechchi beyyi ihu Seelo'om sabukko.

⁶¹Ixxi wodinaa lombinaa mare'i ihu Hidi'l Saga'l saaxina ixxi diina'i qeefadaa massoo'isa issukko.

⁶²Ixxi minaadaba bisa'ina higisaa uwwukko; ixxi sharad/gulummi ihu Isra'eelannem/ luyyannem lobakata quuqukko.

⁶³Ixxuwwika harde'i woraada giir itukko; baajaam landinam bollochcho'i kajja kadakko'oyyo.

⁶⁴Ixxuwwi qeessuwwam bisa'inne shakko'o; ixxuwwi meentim wi'lliteena xanto'oyyo.

⁶⁵Waa'im diriiriinsi baqoo manchisa ki'ukko; woyi'n diqaasa agaa dimbo billixxu malaayyaamisam shoottukko.

⁶⁶Ixxi diina'a aphphisaa laso daba'llitamisa issukko; heer heerinam sholle'nna gunguu'llitamisa issukko.

⁶⁷Ixxim Yooseef shum'o gadaa urukko; Efireem sullom doo'llukkoyyo.

⁶⁸Ihukkaarem Yihuxxi sulloo lobakata iittoo Xiyoo'n duunaa doo'llukko.

⁶⁹Ee beyyonnem iimanenne yoo ixxi mine labo Keesammi Mine baxukko; ee minem uullisa qoxxaa heer heerina hee'oohan issukko.

⁷⁰Ixxena awwaadaanchi Daawiitam doo'llukko; gereebba allaaroo beyyiinsim massukko.

⁷¹Gereebba allaaroo beyyiinsi massaa ixxi minaadabina Yaaqoobina ixxi gulummi ihu Isra'eelinam allaaraanchi issukko.

⁷²Daawiitim hanqo'i wodaninne ixxuwwa allaarukko; danaam qooroominnem awwonsukko.