Read Hadiyya Mazmuu'l Kitaaba 79 Bible Online

Mazmuu'l Kitaaba 79 - Hadiyya bible

Mazmuu'l Kitaaba 79

¹Waa'a! Mulli minaadab ki uullanne weeratto'ookko; ki Keesammi Minem haashaassito'ookko; Yerusaalee'm beero'om gindita'a bi'isso'ookko.

²Ki awwaadaa'nneka leesha iima'n ammarina keesammuwwikam maara uulli moochchina hurbaat issita'a uwwito'ookko.

³Ixxuwwika xiiga Yeerusaalee'm kululleetanne dirisisa daassito'o; ixxuwwa waammookkokim bee'e.

⁴Neesem ni olla'ina naac inkummo; ni kululleetanne yo'i keenim neesenne osattamisaa neese gaddamisaa inkummo.

⁵Waa'a, at neesenne quuqqoottok heer heerinattemennihe? Ki to'achchidu gii'llisa aphphukkuuyyi hee'oo'isamennihe?

⁶Keese laqqambee'i minaadabannee ki summa weeshshambee'i adilluwwannee ki bala'a dilliise.

⁷Mashka'oomim ixxuwwi Yaqooba shito'ookko; ixxi heechchi beyyom diihisso'ookko.

⁸Niyyanno'i baaxii'l bikkina neese guzumo'llitte; ki qishixxat qaqqisaa niina waarona; mashka'oomim neese kee'mmaalli hawwonnette.

⁹Neese gatisaanchi Waa'a! Ki lombaam summi bikkinaa yitaa niina hara'mme; ki summi bikkinam ni baaxiilo haafitaa neese gatise.

¹⁰Mulli minaadab mahina «Ixxuwwi Waa'i hannonnette?» yitamane? Ki awwaadaa'nneka dunamu xiiqqi baado miqissoo'isa neesem moo'nnummuuyyi mulli minaadabina la'ise.

¹¹Karatonne yo'i kee'n laachcha at macceese; leh oogatamu keenom ki wodaam malaayyinne gatise.

¹²Waa'a! Ni olla'i keesenne naacantam naacancha lamar suum issitaa ixxuwwanne dabare.

¹³Ee ammane neese ki allaachchi gereebbi inkummi ki minaadab heer heerinam kiina galata uwwinoommo; qaranchiinsi qaranchi afeebe'em kiina galata alallaantoommo.