Read Hadiyya Mazmuu'l Kitaaba 81 Bible Online

Mazmuu'l Kitaaba 81 - Hadiyya bible

Mazmuu'l Kitaaba 81

¹Niina malaayyi ihu Waa'ina liiranchinne zammallehe; Yaaqoob Waa'inam ililillehe.

²Ki'llakka'a dibbe'e aphphissakku'uuyyi zammallehe; diitta'innee maasiinqo'innee liiransoo mazmuura macceesissehe.

³Aga'n aagganne ni lombi uguxxi ballanne xurumba fuggehe.

⁴Ookki Isra'eelina uwwamaakkoo seera; Yaaqoob Waa'im uwwaakkoo ijaajo.

⁵Gibxiinsi firu ammane ka seera Yooseefina uwukko; an la'oombee'i suuminnem

⁶«An ixxi gudumiinsi iyyo dilliisaammo; ixxi angam sananna iyyimmiinsi usheexxisaammo.

⁷At hawwonne hee'llitti ammane eese weeshshitto; anim keese gatisummo; guqqi woronne maaxammi beyyonne ihaa kiina dabachcha uwwummo; Mariib wo'i gadanonnem keese keenummo.

⁸I minaadaba, an ki'nnuwwina qoxxisaa kuroommoka macceessehe; Isra'eela, macceessakko'aare erane.

⁹Ki'nnwwina mulli waa'i hee'oone; mulli waa'ina otossitakkotte.

¹⁰Gibxi uulliinsi fissummok ki'nnuwwi Moollanni Waa'i anette; Ki'nnuwwi suume haraassitakka'a fooqaa'llehe anim wonshoommo.

¹¹«Ihukkaarem i minaadab i woshsha macceesukkoyyo; Isra'eel iina ijaajamukkoyyo.

¹²Ee bikkina ixxuwwi tii'llisa ikkona duudaakkoo ixxuwwi woda'n sawwitina higisaa uwwummo.

¹³I minaadab i woshsha macceesaakkoota'n Isra'eelim iina ijaajamaakkoota'n

¹⁴ixxuwwika diina'a qaqqisom kaa'am hee'ummo; ixxuwwi maso'onnem i woda ki'isam hee'ummo.

¹⁵Waa'a sabbam keen hundim ixxi illagenne huxe'llamo; heer heerinam guzumo'antamo.

¹⁶Ihukkaarem an ki'nnuwwina muccur arasa itisoommo; qoxxaalli ki'n marabom goddisoommo» yoo maccesummo.