Read Hadiyya Mazmuu'l Kitaaba 83 Bible Online

Mazmuu'l Kitaaba 83 - Hadiyya bible

Mazmuu'l Kitaaba 83

¹Waa'a! Cawwitaa uttitte; Waa'a! sa'ititte; moo'llaa cawwititte.

²Oono'o, ki diina'i keesenne sha'llantamulla; keese sabbam keen gaga iimiimaa'llo'ookko.

³Ixxuwwi ki minaadabanne maaxaqqanne dollotto'ookko; iittitoo ki oosonnem mat ikka'a ki'llo'ookko.

⁴Ixxuwwim «Waallehe, Isra'ee'llek summi od tiiramoobee'isa minaadabam ihoobee'isa bi'insona» yito'o.

⁵Hundim mat ikka'a a'llanto'ookko; keesenne ki'lleena hide'anto'o.

⁶Oo keenim Edoo'mmane, Ismaa'eelane, Moo'aaphphane Aggaarane,

⁷Geebaalane, Amoonane, Amaaleeqane, Filisxee'manee Xiiroos mannaa.

⁸Loox oosina hara'mmiteena Aasoo'l mannim ixxuwwinne mat ikko'o

⁹At Miidiyaa'm mannanne issittoka ixxuwwannem isse; ee'isam Siisaarannee Yaabinannee Qiishoo'n daajjenne issittoka kakeenonnem isse.

¹⁰Ixxuwwi Endooranne bi'llo'o; ixxuwwi leeshim biir uullanne shamukko.

¹¹Ooreebannee Zaa'eebannee issittoka ixxuwwi daannuwwannem isse; Zeebaahannee Xalmuna'annee issittokam ixxuwwi gassaanonnem isse.

¹²Ixuwwim «Waa'ika allaachchi biira ni gaqqan issinona» yitam keeno.

¹³Ee bikkina Waa'a! Ixxuwwa hambu'llam dira binnaa'oo'isa binnaa'e; hafachchi massoo bura'isam isse.

¹⁴Giir dooma itoo'isam gii'l laban duunnuwwa shokkiisoo'isam

¹⁵ki wiisho'inne holle; ki hambu'llaminnem muggise.

¹⁶Waa'a! Ixxuwwi keese badditamisina ki diina'i tuuttamisa isse.

¹⁷Ixxuwwi heer heerinam tuuttona; hanshiba'llitona; sholle'lla'ahim bi'llona.

¹⁸Kiikki summi Waa'i ihu xale'i at uulli hundannem hundiinsi loban ikkittisa laqqona.