Read Hadiyya Mazmuu'l Kitaaba 84 Bible Online

Mazmuu'l Kitaaba 84 - Hadiyya bible

Mazmuu'l Kitaaba 84

¹Gogoxxi Moollanni Waa'a! Ki min hinkaa'nna mishsoohane.

²I foor Waa'i mine quluxukko; lobakatam mixukko; i maarii foorii hee'oo Waa'anne liiramukko.

³Iina adilaa Waa'aa ikkitti gogoxxi Moollanna! Kiina kitima hincaa'akkam beyyi gadanonne waaxiigena gatti beyyi maccogaar ciicoollinam do'n yookko.

⁴Ki minenne hee'llam keen hinkaa'nna maassaammuwwa! Ixxuwwi heer heerinam keese galaxxitamo.

⁵Waa'a, hara'mmat kiinniisetti ihu keen wodanonnem ki mine mareena liiramoo keen maassaammuwwa.

⁶Baakaa yakkam cebbinne higga'a lasage wo'i bu'i firoo beyyo affamo; qaraaxonne ga'nnoo xeenim ee beyyonne delbi ihookko.

⁷Ixxuwwinam malaayyenne malaayyi exxookko; waa'uwwi hundinam Waa'am Xiyoonanne moo'llamo.

⁸Gogoxxi Moollanni Waa'a! I uunxato macceese; Yaaqoob Waa'a, macceese.

⁹Waa'a! At doo'llitti ni agira moo'e.

¹⁰Mulli beyyonne kum ayyaamo hee'immiinsi ki minenne mat ayyaamo hosimmi iina e'llookko; baaxiilaan kee'n minenne hee'immiinsi Waa'i mi'n goocanne waardiyyichchi ihimmi e'llookko.

¹¹Neese egeraanchii gassaanchii ni Moollanni Waa'i ihu bikkina nuuraa lombaa uwwookko; Waa'i xabbeen keenina er luwwa hoorooyyo.

¹²Gogoxxi Moollanna! Keesenne amma'nnamoo manchi maasse'amaakkoohane!