Read Hadiyya Mazmuu'l Kitaaba 86 Bible Online

Mazmuu'l Kitaaba 86 - Hadiyya bible

Mazmuu'l Kitaaba 86

¹Waa'a! An hoongaanchoo buxichchoo ihummi bikkina i uunxato macceessaa dabachcha uwwe.

²An i gaga kiina higisaa uwwaammoohan ihummi bikkina eese egere; i Waa'a keesenne amma'nnammoo ki agishsho gatise.

³Waa'a, an balli hundoomam ki kollonne laaroommuulli ihu bikkina iina haafihe.

⁴Waa'a! An keese uunxoommuulli ihu bikkina eese ki agishsho liiranse.

⁵Waa'a! At biijaallaa haafitoohanee; keese weeshoo keen hundinam ki eroommi lobakata.

⁶Waa'a! I uunxato at macceese; i uunxaxxekam laachcha macceese.

⁷At i uunxato macceessoo bikkina hawwi ammane keese weeshoommo.

⁸Waa'a! Keese laboo waa'i bee'e; ki baxxinnem akeekixxamoo bax bee'e.

⁹Waa'a! At qooccitti minaadab hundim watta'a kiina otossitamo; ki summam lonsitamo.

¹⁰At hundiinsi lobane; maalalsiisoo baxom baxxootto; Waa'im xale'i atette.

¹¹Waa'a! Ki googo iina losise; anim ki hanqanne hee'oommo; ki summam baddoommisina iina mat tiiro uwwe.

¹²I Moollanni Waa'a! Wo'm wodaninne keese galaxoommo; ki summam heer heerina lonsoommo.

¹³Ki eroommi iina lobakata; eese Sii'ooliinsi gatissaatto.

¹⁴Waa'a! Hantaaraan eesenne ki'llo'ookko; keese badditambee'i mogaalli keen eese shiteena hassamuulla.

¹⁵Waa'a! Ihukkaarem at biijaallaa qishixxitoo Moollannaa; quuqimminam gaaggaabboobee'ane; ki eroommii amma'nnantaattoohaannoomii lobakata.

¹⁶I kollonne daba'lle; iina haafihe; iina ki agishshina malaayye uwwe; kiina agishshotti hee'llo'aanti beeto gatise.

¹⁷Waa'a! At iina ki biijoo'm mare'e moo'ise; at eese hara'mmitoo'isaa qoxxissoo'isaa moo'lla'a eese sabbam keen tuuttona.