Read Hadiyya Mazmuu'l Kitaaba 88 Bible Online

Mazmuu'l Kitaaba 88 - Hadiyya bible

Mazmuu'l Kitaaba 88

¹Eese gatisaanchi Moollanni Waa'a! An ballaa hiimoo ki illagenne laaroommuulla.

²I uunxato at macceese; ki maccem i laachchi kollonne dabare.

³Eesenne lobakat hawwi afu bikkina an leheena hincaammo.

⁴An lehaa barenne aagoo manchisa ihaammo; i malaayyim hoogaakko.

⁵An lehaa ubu mannisa, shakka'ahim waammakko'i kee'nnisaa at tiittoobee'isa ki angiinsi firaa bi'u mannisaa ihaammo.

⁶At eese tuunsonne leh haf woronne xillaalli barenne uunjitto.

⁷Ki quunqi eesenne kee'mmaakko; womoo'llisam eese xuuxaakko.

⁸I besh iinniinsi qee'lloo'isa issitto; ixxuwwim eese shigigitamisa issitto; an kibbamaammo; xoreenam xanoommoyyo.

⁹Kichchechchi lophphu bikkina i illi jaamaakko; Waa'a! An hundi ammanem keese weeshoommuulla; i angam ki kollonne biddiqaa'aammo.

¹⁰Leto'i keenina at aganna baxxoohonnihe? Leto'i keendu ki'lla'a keese galaxxitamonnihe?

¹¹Ki eroommi waammi woronne amma'nnantaattoohaannoomim bichchi beyyonne kuramoohonnihe?

¹²Ki aganni tuunsi woronne; ki muccuroomim xadamu manni beyyonne la'amoohonnihe?

¹³Waa'a! Ihukkaarem iina hara'mmitona an ki kollonne laaroommo; daranne an keese uunxoommo.

¹⁴Waa'a! At eese mahina uunjitto? Ki gagam iinniinsi mahina daphphaa'llitto?

¹⁵An oosoommaniinsim ki'isaa hawwaanchoo lehina hincaammoohanee; ki hibbi eese u'nnisaakko; anim neeyyato muraammo.

¹⁶Ki quunqi eesenne tuubamukko; ki bala'im eese bi'isukko.

¹⁷Oo keen balli hundoomam eese dirisisa kibbito'o; kolli hundinnem mat ikka'a eese kibbita'a amaddo'o.

¹⁸Eese iittitam keenoo i beshaa iinniinsi qeessitto; xale'i tunsi iina beshichchi ihaakko.