Read Hadiyya Mazmuu'l Kitaaba 89 Bible Online

Mazmuu'l Kitaaba 89 - Hadiyya bible

Mazmuu'l Kitaaba 89

¹Waa'a! Ki eroommi bikkina heer heerinam an zammaroommo; amma'nnantaattoohaannoomam qaranchi hundinam kuroommo.

²Heer heerinam ki eroommi qoxxaa hee'oohan ihukkisaa amma'nnantaattoohaannoomim iimanenne shooho'amaa hee'oohan ihukkisaa an alallaatoommo.

³At «An doo'llummaanninne sagara aagaammo; iina awwaadaanchi Daawiitinam hide'aammo.

⁴Oohim <Ki shumo'i heer heerinam hee'oo'isa issoommo; ki adillanom qaranchiinsi qaranchi afeebe'e qoxxisoommo> yitaa» hee'llittane.

⁵Waa'a! Iimannuwwi kiikka maalalsiisoo baxoo amma'nnantaattoohaannoomaa keesammi kee'n dummichchi lambe'enne galaxxookko.

⁶Iimanenne Waa'inne akeekixxamoo hinkane? Iima'n qooccanchuwwiinsidu Waa'a laboo hinkane?

⁷Waa'i keesammi kee'n dummichchi lambe'enne lobakata baddisoohane; ixxi kululleetanne hee'oo keeniinsi hundiinsim hibbaamo.

⁸Gogoxxi Moollanni Waa'a! Kiinni'nnoo'ok ayyette? Waa'a! At wodaamo; at hundi luwwannem amma'nnantaattoohane.

⁹At malaayyaam dambalaqqam ki daannoominne ijaajjootto; womoo'l malaayyem sa'issiissootto.

¹⁰Ra'aaba yakkam lob moochchichchom xaansitaa shitto; ki malaayyaam wodinnem ki diina'a binnaa'llitto.

¹¹Iiman kiihane; uullim kiihane; uullaa uullanne yoo luwwaa hundam at qooccitto.

¹²Hanaa'n qaraa woroo'n qaraa at qooccitto; Taaboo'l Duunii Armooni'ee'm Duunii liiranchinne kiina zammarookko.

¹³At hore'em malaayyaamo; ki wod malaayyaamo; ki makki angim iimiimaakkoohane.

¹⁴Ki adillan shoohamukkok muccuroomannettee hanqannettee; eroommii amma'nnantaattoohaannoomii ki illagennette.

¹⁵Waa'a! Keese galaxxitu'uuyyi zammattam keenii ki biijoo'm caakkanne hee'llam keenii maassaammuwwa.

¹⁶Oo keen balli hundoomam ki summanne liirantamo; ki muccuroomannem lobakata liirantamo.

¹⁷Ixxuwwi malaayyina lombi atette; ki biijoominnem ixxuwwi malaayyi qoxxukkuuyyi marookko.

¹⁸Waa'i niina agira; Isra'ee'l keesammim ni adila.

¹⁹Amma'nnamaakkoo ki minaadabina mat ammane kaaltanne «Mat geeda adil issaammo; i minaadabiinsi doo'llamukkokam iimiimaa'aammo.

²⁰I awwaadaanchi Daawiita siidummo; i keesammi zaytam ixxonne labummo.

²¹Anim ixxenne ihoommo; i wodim ixxo qoxxisookko.

²²Diina'i ixxo kaa'eena hore'em xanooyyo; jor manchim ixxo sholliisooyyo.

²³Ixxi maso'o ixxi illagennem xaansoommo; ixxo sabbam keen hundam bi'isoommo.

²⁴Amma'nnamaammoohaannoomii i eroommii hundi ammanem ixxenne ihookko; i summinnem ixxi malaayyi iimiimukkuuyyi marookko.

²⁵Ixxeka anga dambalaqanne makki angam daajjuwwanne biddiqaa'ookko.

²⁶Ixxim iina ‹At iina anna; i Waa'a, joriinis egeraanchoo eese gatisaanchoo› yookko.

²⁷Anim ixxo i won qachchi issoommo; uulli adilluwwi hundiinsim iimiimaa'oommo.

²⁸I eroommi ixxena heer heerinatteme; ixxenne aagummi hidi'l sagarim qoxxaa hee'ookko.

²⁹Ixxi shumo'o heer heerinam ixxi adillanom iima'nnisa qoxxisoommo.

³⁰«Ihukkaarem ixxi shumo'i i seera gindulas i ogoranne hee'ubeelas

³¹i gatti ogora haashaassulas i ijaajom egerubeelas

³²ee baaxii'l mashka'inne ixxuwwa guzumo'oommo; ixxuwwi hawwojji mashka'innem ixxuwwanne hawwi afoo'isa issoommo.

³³Ihukkaarem i eroomma ixxeensi qeessoommoyyo; amma'nnamaammoohaannoomam ixxena xa'isoommoyyo.

³⁴Ixxenne aagummi hidi'l sagaram gindoommoyyo; an wocummi sagaram dabaroommoyyo.

³⁵Mexxo'aaggem i keesammoominne hide'ummi bikkina Daawitina qophphanoommoyyo.

³⁶Ixxi shumo'i heer heerinam ixxi adillanim i illagenne eelliinchisa qoxxaa hee'ookko.

³⁷Iimanenne amma'nnamaakkoo naqaash ihaa hee'oo aga'nnisa ixxim heer heerinam qoxxaakkoohan ihookko» yitaatto.

³⁸Ihukkaarem kaba at ixxo sabbaatto; uunjitaattome; at doo'llittaannonnem lobakata quuqqaatto.

³⁹Ki awwaadaanchinne aaggitti hidi'l sagaram ginditaatto; lombi adilla'n mare'em buchchanne ubbuussaatto.

⁴⁰Ixxi oottuwwa hundam ginditaatto; girbuwwam bi'issaattto.

⁴¹Gooqqi araat hundim ixxi amaxxa boggo'o; ixxi olla'i manni hundim ixxonne osatto'o.

⁴²Ixxi maso'i ixxo kaa'llamisa issitto; ixxi diina'im liirantamisa issitto.

⁴³Ixxeka bisa'a juujissitto; orannem ixxena hara'mmittoyyo.

⁴⁴Ixxi Adillano ixxeensi hoottitto; ixxi adilla'n barcumam buchchanne ubbuussitto.

⁴⁵Ixxo ammanbee'em lomma'nnoo'isa issitto; ixxonnem tuulla gunguussitto.

⁴⁶Waa'a! Ki gaga maaxxoottok heer heerinattemennihe? ki quunqi gi'llisa aphphookkokdu hinkaa'n amman afeebe'e?

⁴⁷I umur hinkaa'nna gundi ihuda'e sawwihe; manchi beeto qooccittok awwaad bee'an issitaatennihe?

⁴⁸Lehoo'n hee'oo manchi yoohonnihe? waammamoo'n gateena xanookkokdu ayyette?

⁴⁹Waa'a, Daawiitina hanqinne hide'llitti gaassi ki eroommi hannonnette?

⁵⁰Waa'a, ki awwaadaanchonne hinkaa'nna naacakkoda'ee lobakat kee'n gado'om iyyaqqaa yoommisaa sawwihe.

⁵¹Waa'a! At doo'llitti adila ki diina'i game'llitamuulla; maroo beyyi hundannem ixxonne naaccamoka sawwihe.

⁵²Waa'i heer heerinam maasse'amona! Ameen! Ameen!