Read Hadiyya Mazmuu'l Kitaaba 9 Bible Online

Mazmuu'l Kitaaba 9 - Hadiyya bible

Mazmuu'l Kitaaba 9

¹Waa'a! I wodan hundinnem keese galaxxoommo; maalalsiisoo ki agganni hundam an kuroommo.

²An keesenne lobakata liiramoommo; Hundiinsi Lob Waa'a! Ki summi bikkina zammaroommo.

³I diina'i laso daba'llitam ammane qolantamo; ki illagiinsim bi'llamo.

⁴At adilla'n barcumanne afuuttaa hanqo'i oogato ogattoohane; i woshsha moo'llaa i hanqa egettaa hanqo'i oogato iina oogattootto.

⁵Mulli minaadaba axeettitto; jor keenom bi'issitto; ixxuwwi summam heer heerina shiinshitto.

⁶Diina'im heer heerina bi'ukko; ixxuwwi beero'uwwam at gindansitaatto; ixxuwwa tiirakkam luwwi hundim bi'aakko.

⁷Ihukkaarem Waa'i adil ihaa heer heerina hee'oohane; ixxi adilla'n barcumam oogato'ina gudisaakko.

⁸Ixxi heer uullanne hanqo'isinne oogatookko; minaadabam hanqinne gassookko.

⁹Waa'i wor amadanto'i keenina girba; hawwi ammanem ixxuwwi maaxantam girba.

¹⁰Waa'a! Ki summa laqqam keen hundim keesenne bakke'llamo; Waa'a! Keese hassam keenom uunjitooyyo.

¹¹Xiyyoonanne hee'oo Waa'ina zammallehe; ixxi issu luwwam minaadab hundinam alallaattehe.

¹²Xiiga miqisoo Waa'i ixxuwwa sawwoo bikkina wor amadanto'i kee'n laachcha cawwaa urooyyo.

¹³Waa'a! At iina qishixxe; i diina'i eesenne afissam hawwo moo'e; lehiinsem eese gatise.

¹⁴Eehid issittoo ammane Xiiyoo'n gooccanne kiina galata alallaatoommo; eese gatissitti bikkinam lobakata liiramoommo.

¹⁵Mulli minaadab ixxuwwi hinto'i barennem ubbo'o; ixxuwwi lokkim maaxxa'a qaashsho'i qaashanne amadamukko.

¹⁶Waa'i hanqa oogatimminne la'amaakkoohane; baaxiilaan ixxiwwi jor baxinnem amadanto'o.

¹⁷Jor keen daba'llita'a Sii'oolanne dillitamo; Waa'a xaddam kee'nnek lasaanchi eehane.

¹⁸Hawwaan xadanto'isam hee'llamoyyo; bux kee'n neeyyatim heer heerina awwaad bee'an ihaa gatooyyo.

¹⁹Waa'a! Ki'e; manni malaayyoone; mulli minaadabanne at oogate.

²⁰Waa'a! Baachchi ixxuwwa amadoo'isa isse; mulli minaadab maara edde'llo'oo manni ikko'isa laqqamisa isse.