Read Hadiyya Mazmuu'l Kitaaba 90 Bible Online

Mazmuu'l Kitaaba 90 - Hadiyya bible

Mazmuu'l Kitaaba 90

¹Waa'a, at doolli hundinam neese yabo aangoommi beyyi ikkaatto.

²Duunnuwwi kaasamoo'n illageenim uullaa heer uullaa qoocciteena illageenim heer heerinam at Waa'a.

³Manchi beet buchchanne exxoo'isa issitootto; <<Manchi beeto, daba'llitaa buchchi ihe>> yitootto.

⁴Kum hiinchi ki illagenne mat ballisa; higaa maru beeballisa; odim mat hii'm saxxi suu'mmisa.

⁵At dirsisa fii'llaa massitoo ammane haqaawwisa bi'llamo; ixxuwwi dara mutoo haareechchi hixisa.

⁶Hix dar dara lataa fiitookko; ihukkaarem maaro'inne quubaa gogookko.

⁷Neese ki quunqinne bi'nnaammo; ki nadajjinnem mugginaammo.

⁸Ni hawwojja ki illagenne maaxamaakkoo ni baaxiilom ki caakkanne dissitto.

⁹Ni doolli hundim ki quunqinne higaakko; ni umurim qitinimminne beeddoolla.

¹⁰Ni umur lamarayyi hiincho; lophphukkaarem sadeentayyi hiincho; eehanniinsi lophphulas xale'i hoongee hawwoo. Qaqqisaa higookko; neesim wijjinoommo.

¹¹Ki quunqi malaayye ayyi la'ookko? ki nadajji ki hibbi qaxa baddisoohane.

¹²Neese qoor manni inkoommisina ni umur hinkaa'nna gunda'e niina losise.

¹³Waa'a, hay daba'lle; kuk hinkaa'n amman afeebe'inatte? Ki awwaadaanina at qishixxe.

¹⁴Neese ni umu'l doollenne hundannem liirammonaa ililinonaa ki eroomma darina darina niina moo'ise.

¹⁵Hawwinne higinsummi doolli bikkee joram moo'nnummi hincuwwi bikkee neese liiranse.

¹⁶Ki bax ki awwaadaanina ki lombim ixxuwwi oosina la'amona.

¹⁷Ni Moollanni Waa'ik nuur neesenne ihona. Ni bax hundim mishaam ihoo'sa isse; eeyya, mishaam isse.