Read Hadiyya Mazmuu'l Kitaaba 96 Bible Online

Mazmuu'l Kitaaba 96 - Hadiyya bible

Mazmuu'l Kitaaba 96

¹Waa'ina haareechchi mazmuura zammallehe; uullanne hee'llakkam minaadab hundim Waa'ina zammallehe.

²Waa'ina zammallehee ixxom galaxxehee; ixxi gatisaanchi ihukkisam balli hundam alallaattehe.

³Ixxi lombam minaadab hundinam la'issehe ixxeka maalalsiisoo baxom manni hundinam kullehe.

⁴Waa'i hundiinsi loban ihu bikkina ixxena lophphaakkoo galat hasisookko; mulli waa'uwwiinsi hundiinsim loboka ixxo baddimmi hasisookko.

⁵Mulli minaadab otossitam waa'uwwi hundim qophpha'n waa'uwwa; ihukkaarem Waa'i iimannuwwa hundam qooccukko.

⁶Lombii hibbii ixxi kululleetanne yookko; ixxi minennem malaayyii nuurii wo'mmaakko.

⁷Uullanne hee'llakkam minaadab hundim Waa'a galaxxehe; lombaa galataa Waa'ina uwwehe.

⁸Ixxi summina laboo lomba Waa'ina uwwehe; kitima amaddaakka'a ixxi mi'n wixxixxi beyyo aaggehe.

⁹Hibbaamoo keesammaa ihu Waa'ina otossi'llehe; uulli hundim ixxi illagenne huxe'ona.

¹⁰Minaadab hundinam «Waa'i adila; uulli qoxxaallisa kaaxxaakkoo bikkina heekke'ooyyo; minaadab hundinam ixxi hanqinne oogatoohane» yi'llehe.

¹¹Uullii iimanii liirammehe; dambalaqii woronne yoontakke'i luwwii hundim ilili'llehe.

¹²Biir uullii ee uullanne yoontakke'i luwwii hundim liirammehe; doo'mmo'l haqqi hundim liiranchinne ilili'llehe.

¹³Mashka'oomim Waa'i uullanne oogateena waarookko; heer uullanne muccuroominne uullannem ixxi hanqinne oogatookko.