Read Hadiyya Mazmuu'l Kitaaba 97 Bible Online

Mazmuu'l Kitaaba 97 - Hadiyya bible

Mazmuu'l Kitaaba 97

¹Waa'i adila; uulla, at liirame; dambalaq lambe'enne yoontakke'i uulli hundim liirammehe.

²Duubii gambabbaakkoo tuunsii ixxi kululleeta kibbaakko; ixxi gassim muccuroomannee hanqo'i oogatonnee shoo'amaakkoohane.

³Giir ixxi illaginne marookko; ixxi kululleetanne hundannem yoo diina'i hundam itookko.

⁴Banqi belellaat heer uullanne caakkisookko; uullim eekka moo'aa huxe'ookko.

⁵Uulli hundinam Moollanni ihu Waa'i illagenne duunnuwwi leeyyisa bukkamookko.

⁶Iiman ixxi muccurooma alallaatookko; minaadab hundim ixxi lomba moo'ookko.

⁷Anginne baxakko'i misilanne otossitam keenii mulli waa'annem bakke'llam keenii hundim tuuttamo; mulli waa'uwwi hundim Waa'i illagenne ubba'a otossitamo.

⁸Waa'a! Ki oogaxxi bikkina Xiyoo'n minaadab macceesaa liiramookko; Yihuxxi beero'uwwim lobakata liiramookko.

⁹Waa'a! At uulli hundannem hundiinsi loban ikki bikkina mulli waa'uwiinsi hundiinsim hanaanette.

¹⁰Waa'a iittitakkam keen jolle sabbehe; Waa'a badditam kee'n foore ixxi egeroohane; jor kee'n angiinsim gatisoohane.

¹¹Caakki muccur keenina firookko; liiranchim wodano xabbeen keenina ihookko.

¹²Muccur keen hundim Waa'anne liirammehe; keesamaakkoo ixxi summam galaxxehe.