Read Hadiyya Kobi'llishshi Kitaaba 1 Bible Online

Kobi'llishshi Kitaaba 1 - Hadiyya bible

Kobi'llishshi Kitaaba 1

¹Ku kobi'llishshuwwi Isra'ee'l adil hee'u Daawiit beet Salamoon wocu kobi'llishshuwwa.

²Kobi'llishshuwwim qooroomaa danaam sogitanoo, hindihakkamisinaa xillaalli lachchi yoo sagara qoossakkamisinaa hara'mmoo keeno.

³Amma'nnanchinnee xabbeenoominnee hanqo'i heechcha hee'akkam qooroomam mannina losisookko.

⁴Lachchi hoffe'u keeninaa harde'uwwinaa lachchaa gaga ege'llimmaa losisookko.

⁵Qoor manni ka kobi'llishsha macceesaa lachcha siixxookko; qoossimmi yoo manni odim danaam sogitano siixxookko.

⁶Odim kobi'llishsha, kobi'llishshi tirato, qoolluwwi kee'n sagaraa daphphaakkoo booyyaansaa la'immina hara'mmookko.

⁷Qooroomina illag Waa'a baddimma; ihukkaarem qawwuwwi keen qooroomaa er sogitanoo gaddamo.

⁸I beeto, at kiyyannika sogitano macceese; kiyyummakam losishsha gadditte.

⁹Kiyyannikii kiyyummakii sogitan ki horoorina adilla'n mare'isa; ki gaanjinam mishisoo worqinne baxamu co'llesa ihookko.

¹⁰I beeto, baaxiilaan keen ixxuwwinne maqire baaxiilo baxxoo'isina qawwiissota'n ha'yyititte.

¹¹Ixxuwwim keese «Niinninnem maqire waare; googonne daphphinaa egellaa hawwoddo'i jolli beeta'nnim muccur kee'n xiiga dunnona.

¹²Lehu manna waammi xuuxoohaannisa neesem ixxuwwa foorinnem xuunxona; waammakkam leeshisam issinona.

¹³Bito xee'aalli lobakat mu'utam siixxinoommo; bongaa eembummi horinnem ni minneewwa wonshinoommo.

¹⁴Kiikka saamo niihaanninnem mat isse; game'imminnee bogimminnee siidamu hora hundam mateeyyam awwaaxxinoommo» yiteena xantamo.

¹⁵I beeto, ixxuwwinne maqire mattitte; ee manni googiinsem qee'lle.

¹⁶Ixxuwwi jor baxo baxxeena geettamo; manna shiteenam gaaggaabbamo.

¹⁷Ciikkichcho amaddeena qaashshootti kiyyo'o ciikkichchoom la'ulas oo kiyyo'i mat luwwam awwaadooyyo.

¹⁸Ihukkaarem jor baxo baxxam keen letam qaasha ixxuwwi anginnem qaaccitamo.

¹⁹Ee'isam ku goog bogoo kee'n heechcha bi'isoohane; damiga baxxam kee'nnekim gada'i eehane.

²⁰Qooroom burannee wixxixxi beyyonnee sagara iimaa'aa weeshoolla.

²¹Manni wixxoo beyyonnee beero'i goocannee hundannem weeshoolla.

²²«Ki'nnuwwi qawwuwwi keen qawwooma doo'llitakkamok hinki balli afeebe'e? Lachchanne gurubimmannem liirantakkamok hinki balli afeebe'e? Lachcha sabbakkamokim hinki balli afeebe'e?

²³I sogitano macceessehe; danaam sogitanom uwwoommo; i lachchikam ki'nnuwwina baxxansoommo.

²⁴I kollo daba'llitakkamisina anga biddiqaa'a weeshummaare sabbakko'o.

²⁵I sogitanom gaddakko'o; i axeerimmam aa'llakkeena hassakko'oyyo.

²⁶Ee bikkina hawwii bichchii ki'nnuwwanne afoo ammane osaroommo; muggisoo luwwi waaroo ammanem naacoommo.

²⁷Muggisoo luwwim dirisisa waaroo ammane bichchim hambu'lla'm hafachchisa waaroo ammane u'nnisoo hawwim ki'nnuwwanne dilloo ammane naacoommo.

²⁸Ee ammane eese weeshshakkamo; ihukkaarem an ki'nnuwwina dabachcha uwwoommoyyo; beyyi hundannem erisa hassakkamo; ihukkaarem eese siiddakkamoyyo.

²⁹Lachcham sabbakko'o; waa'ina ijaajantakkeenam hassakko'oyyo.

³⁰I sogitanom hassakko'oyyo; shaaqoommi shaaqimmam gaddakko'ookko.

³¹Ee bikkina Ki'nnuwwi baxxakko'i baxika misha ittakkamo; ki'nnuwwi baxxakko'i hantaa'llekam bikke a'llitakkamo.

³²Lachchi hanqatu keeno lachchiinse qee'llimmi shookko; qawwuwwi keenom innaannimmi bi'isookko.

³³Ihukkaarem i woshsha macceesookkok xumminne hee'ookko; joram baddoo'n matem kichchechchi bee'em hee'ookko» yukko.