Read Hadiyya Kobi'llishshi Kitaaba 11 Bible Online

Kobi'llishshi Kitaaba 11 - Hadiyya bible

Kobi'llishshi Kitaaba 11

¹Qophpha'n keennanchinne keentam keeno Waa'i sabookko; ihukkaarem hanqo'i keennaanchinne keentam keenonne Waa'i liiramookko.

²Bolxoom waarulas sholle'n waarookko; ihukkaarem maashaalli kee'n beyyonne qooroom siidamookko.

³Xabbeen manna ixxuwwi hanqo'i baxim awwonsookko; ihukkaarem amma'nnantambee'i manna ixxuwwi boqqoomim bi'isookko.

⁴Quunqi waaroo balla amaxxi hara'mmooyyo; ihukkaarem muccuroom lehiinsi gatisookko.

⁵Muccur manchik muccuroom hee'oo heechcha xabbaa'ookko; ihukkaarem jor manchi ixxi jollannem ubookko.

⁶Xabbeen manna ixxuwwi muccuroomim gatisookko; ihukkaarem amma'nnantambee'i manna ixxuwwi jor mixanim qaashaa amadookko.

⁷Jor manchi lehoohaare ixxi neeyyat bi'ookko; ixxi malaayyenne bakke'u luwwi hundim ixxenne maqirem bi'ookko.

⁸Muccur manchi hawwiinsi gatookko; ihukkaarem baaxiilaanchi manchonne oo hawwi afookko.

⁹Waa'a la'oobee'i manchi wocoo woshshinne ixxi beshichcho bi'isookko; ihukkaarem muccur manni lachchinne gattamo.

¹⁰Muccur keenina makkoohaare beero'onne liiranchi ihookko; odim baaxiilaan bi'llamaare ilillaat ihookko.

¹¹Hanqo'i manni maassinne beero'i li'ookko; ihukkaarem baaxiilaan kee'n jor woshshinne bi'ookko.

¹²Qoossimmi hoffe'u manchi ixxi beshichcho gadookko; ihukkaarem qoossimmi yoo manchi cawwaa urookko.

¹³Hamoo manchi maaxakko'i woshsha caakkisookko; ihukkaarem amma'nnamaakkoo manchi maaxakko'i woshsha egerookko.

¹⁴Er sogitan bee'ulas minaadab ubookko; ihukkaarem sogoo manni dutoohaare gatimmi ihookko.

¹⁵Laqqoobee'i manchina lubbato aaggilas hawwonne ubbootto; ihukkaarem lubbato aaggibeeta'n e'llookko.

¹⁶Nuuraam meentichcho lomba siiddamo; ihukkaarem mogaalli manchi godda siidookko.

¹⁷Er manchi ixxi gagina eroka baxookko; ihukkaarem mogaalli manchi ixxi gaga hawwodookko.

¹⁸Baaxiilaanchi manchi siidoo luwwi awwaad bee'ane; ihukkaarem muccuroo'm baxo baxoo manchi hanqo'i bito siixxookko.

¹⁹Muccuroominne qoxxaa hee'ookkok heechcha siixxookko; ihukkaarem jor baxonne qoxxaa hee'ookkok lehookko.

²⁰Waa'i jor sawwit yoo manna shigigookko; ihukkaarem miiqakkam luwwi bee'i googonne mattam mannanne liiramookko.

²¹Hanqo'isam jor manni guzumo'antoo'n gattamoyyo; ihukkaarem muccur keen guzumo'anchiinsi gattamo.

²²Qoossimbee'i qanane'i meentichchok dan boonkekkichchi sanenne yoo worqi guma'isa.

²³Muccur kee'n mixanonne eroommi yoohane; ihukkaarem baaxiilaan kee'n mixan bichcha eebookko.

²⁴Ixxena yoohaanniinsi biijoominne uwwoo manchi yookko; ihukkaarem ixxena yoo amaxxi exxukkuuyyi marookko; ee'isam qaxiinsi hanaan idiidoo manchi yookko; ihukkaarem ixxena buxoom exxukkuuyyi marookko.

²⁵Biijaalli manchi goddaanchi ihookko; mullaannina hara'mmato issoo manchi ixxi gaginam hara'mmato siixxookko.

²⁶Xee'nnanne biteeseena hurbaata wixxaa'aa dissoo mancho manni duumookko; ihukkaarem biteeseena meera fissoo mancho minaadab maasse'ookko.

²⁷Eroomma erisa hasoo manchi er luwwa siixxookko; ihukkaarem jolla awwonoo manchonne jor luwwi afookko.

²⁸Ixxi horanne bakke'oo manchi ubookko; ihukkaarem muccur manni er haqqi buyyisa lattamo.

²⁹Ixxi abaroos lambe'enne atanaachcha fissoo manchi matem awwaadoo luwwam siidooyyo; qawwi manchim qoor manchina awwaadaanchi ihookko.

³⁰Muccur manchi bax heechcha uwwookko; lobakat manna dabaroo manchi qoora.

³¹Oono'o, muccur manni ka uullanne hawwo aa'llaman ihulas jor kee'nnekii baaxiilaa'nnekii hinkaanna lophphaakkoohan ihookko?