Read Hadiyya Kobi'llishshi Kitaaba 13 Bible Online

Kobi'llishshi Kitaaba 13 - Hadiyya bible

Kobi'llishshi Kitaaba 13

¹Qoor beet anni sogitano macceesookko; ihukkaarem woshsha gadookkok sogitano aa'ooyyo.

²Er manchi wocoo er woshshika misha itookko; ihukkaarem qawwiissam keen boqqooma baxxeena mixxamo.

³Suumiinsi jor woshshi firoobee'isa ege'lloo manchi ixxi foore ege'llookko; ihukkaarem afukkisa wocoo manchonne bichchi afookko.

⁴Ceemmaalli manchi lobakata mixookko bagaan ma'lluwwam siidooyyo; ihukkaarem faare'aa baxoo manchik mixan wo'mmookko.

⁵Muccur manchi qophphano ha'yyooyyo; ihukkaarem baaxiilaanchi manchik woshshi tuussiisoohanee sholliisoohanee.

⁶Muccuroom miiqakkam luwwi bee'i mancho egerookko; ihukkaarem jolli baaxiilaancho ubbuusookko.

⁷Ma'lluwwim bee'eka goddancho labeena yakoo manchi yookko; mullek odim lobakat amaxxi hee'onam buxichcho labaa hee'ookko.

⁸Goddaanchi ixxi foore amaxxinne gatiseena yakookko; ihukkaarem buxichchi ixxeensi elleesakkam amaxxi bee'i bikkina kichche'ooyyo.

⁹Muccur keenina caakki bololaa caakkookko; ihukkaarem baaxiilaan kee'n caakki xoo'ookko.

¹⁰Bolxoom atanaachcha ki'isookko; ihukkaarem qooroom sogitano aa'oo manni beyyonne hee'ookko.

¹¹Laboobee'i googinne wixxoo amaxxi qaqqisom bi'ookko; ihukkaarem qaphphukkuuyyi wixxoo amaxxi li'ookko.

¹²Neeyyato issakko'i luwwi dasulas tiiro kichche'isookko; ihukkaarem mixakko'i luwwa siidimmi heechcha uwwoo haqqichchisa liiransookko.

¹³Sogitano aa'oobee'i manchonne hawwi afookko; ihukkaarem sogitano aa'oo manchi xumminne hee'ookko.

¹⁴Qoor manchi losisoo losan heechchina bu'o; leh qaash woriinsim manni xoroo'isa issookko.

¹⁵Er lachchi lomba uwwookko; ihukkaarem amma'nnancha hoogimmi bichchanne afisookko.

¹⁶Qoor manchi baxoo baxo hundam qooroominne baxookko; ihukkaarem qawwi manchi ixxi qawwooma caakkisookko.

¹⁷Jor asse'amaanchi hawwo eebookko; ihukkaarem amma'nnamaakkoo asse'amaanchi xumma eebookko.

¹⁸Sogitano aa'oobee'i mancho buxoomii sholle'nnii amadookko; ihukkaarem sogitano aa'oo manchi lomba siidookko.

¹⁹Mixakko'i luwwa siidimmi lobakata liiransookko; ihukkaarem qawwuwwi keen jolliinsi qee'lliteena hassamoyyo.

²⁰Qoor keeninne hosookkok qoor ihookko; ihukkaarem qawwuwwi kee'n beshichchi jor hawwonne ubookko.

²¹Baaxiilaan keen matto'i beyyi hundam hawwi laseesookko; ihukkaarem muccur manni baxxo'i er baxika bito a'llitamo.

²²Muccur manchik amaxxi beetiinsi beetina afookko; ihukkaarem baaxiilaanchi manchika amaxxa muccur manchi lagaa'ookko.

²³Bux kee'n abuulli uullanne lobakat goddi yookko; ihukkaarem hanqa oogatoo manni bee'immiinsi ki'ukkok bi'ookko.

²⁴Ixxi qachcho qaqinne aphphisimma qishixxoo manchi ixxi qachcho sabookko; ihukkaarem ixxi qachcho iittoo manchi guzumo'aa li'isookko.

²⁵Muccur manchi goddeebee'e itookko; ihukkaarem baaxiilaan kee'n godab sibaarukkisam hee'ookko.