Read Hadiyya Kobi'llishshi Kitaaba 14 Bible Online

Kobi'llishshi Kitaaba 14 - Hadiyya bible

Kobi'llishshi Kitaaba 14

¹Qoor meentichcho iseka mine danaamisa gassitamo; ihukkaarem qawwi meentichcho is anginnem is mine ginditamo.

²Xabbeen googonne taakke'oo manchi Waa'a baddookko; ihukkaarem boqqi googonne taakke'oo manchi Waa'a gadookko.

³Qawwi manchi wocoo woshshi ixxi afare biccinne aphphisiisookko; ihukkaarem qoor keen er woshsha wocimminne ixxuwwi gaga gatixxitamo.

⁴Abuulloo mirgo'uwwi bee'ulas gootaranne hurbaat hee'ooyyo; ihukkaarem abuulloo mirgo'uwwi hee'ulas gootaranne hurbaat wo'mmookko.

⁵Amma'nnamaakkoo naqaash qophphanooyyo; ihukkaarem qophphanaanchi naqaash qophphano wocookko.

⁶Bolxoo manchi qoorooma hasuta'nnim siidooyyo; ihukkaarem qoossimmi yoo manchi badaroo'nnim lachcha siidookko.

⁷Qawwi manchi gadaniinsi qee'lle; mashka'oomim ixxi suumiinsi lachcha siiddooyyo.

⁸Qoor manchik qooroom ixxi goog huushamoobee'isa issookko; ihukkaarem qawwi mancho ixxi qawwoomim googo huushamoo'isa issookko.

⁹Qawwuwwi keen baxxo'i baaxiilina gaabbitam bikkenne naacantamo; ihukkaarem xabbeen keen baxxo'i baaxiilina haafite siixxiteena hassamo.

¹⁰Woda'n kichchechchaa liiranchaa gag la'ookko; eekka mulli manni baxxamooyyo.

¹¹Baaxiilaan kee'n min gindamookko; ihukkaarem muccur kee'n min qoxxaa hee'ookko.

¹²Mannina xabbeena laboo goog yookko; ihukkaarem lasaanchoom lehonne afisookko.

¹³Osachchi ammanennem ihuta'n wodanonne kichchechchi hee'eena xanookko; liiranchiinsi lasonne kichchechchi beyyo aa'ookko.

¹⁴Ixxi wodano muccuroomiinsi dabaroo manchi baxu baxika bito siidookko; ihukkaarem muccur manchi ixxi er baxika misha a'llookko.

¹⁵Qawwi manchi wocakko'i woshsha hundam hanqaa yaa aa'ookko; ihukkaarem qoor manchi maroo googo qoossaa la'ookko.

¹⁶Qoor manchi gaga ege'lloo bikkina joriinsi gibookko; ihukkaarem qawwi manchi gaaggabaallaa ixxi gaga ege'lloobee'anee.

¹⁷Quuqoo manchi qawwoo'm baxo baxookko; ihukkaarem qoossoo manchi xa'nnookko.

¹⁸Lachchi bee'i manni qawwoo'mmeka bikke a'llitamo; ihukkaarem qoolluwwi keen lachcha adilla'n mare'isa issaqqitamo.

¹⁹Jor keen er kee'n illagenne guruphphitamo; baaxiilaan keen odim muccur kee'n goocanne heeshtamo.

²⁰Buxichcho ixxi beshichchim ha'yyooyyo; ihukkaarem goddaanchina dut iitti manni yookko.

²¹Ixxi beshichcho gadoo manchi baaxiilaancho; ihukkaarem buxichchina qishixxoo manchi maasse'amaakkoohane.

²²Jor baxo baxxeena sawwitam keen huushanto'oollayyonnihe? ihukkaarem iittii amma'nnanchii eroomma sawwitam keeninatte.

²³Qoxxakka'a baximmi godda siidisookko; ihukkaarem woshsha lonsoo manchi buxookko.

²⁴Qoolluwwi kee'n qooroom adilla'n mare'e; ihukkaarem qawwuwwi kee'n wereeggi qawwooma.

²⁵Hanqo'i naqaash foore gatisookko; ihukkaarem qophpha'n naqaash lagoohane.

²⁶Waa'a baddoo manchina qoxxaalli amma'nnisoo lubbat yookko; ixxi oosinam daphphixxitam girbi hee'ookko.

²⁷Waa'a baddimmi heechchina bu'o; Manna leh qaashiinsi gatisookko.

²⁸Minaadab dutimmi gassoo adilina lomba; Ihukkaarem minaadaphphek xig hoffe'immi adilina bichcha.

²⁹Xa'nnoo manchina lobakat do'ixximmi hee'ookko; ihukkaarem quuqoo manchi ixxi qawwooma la'ixxookko.

³⁰Xummi yoo wodan orachchina fayya'ooma uwwookko; ihukkaarem to'achchim miqiic jabbisa hawwodookko.

³¹Buxichcho u'nnisookkok ixxo qooccu Waa'a gadookko; ihukkaarem buxichchina qishixxookkok qooccu Waa'a lonsookko.

³²Baaxiilaanchi baxu jollinnem ubookko; ihukkaarem muccur manchi amma'nnamaakkoohan ihimminne egeramookko.

³³Qooroom do'ixxoo manchi wodanonne hee'ookko; ihukkaarem qawwuwwi kee'n wodanonne qooroom hee'ooyyo.

³⁴Muccuroom minaadaba lonsookko; ihukkaarem baaxiil minaadaba sholliisookko.

³⁵Qoor awwaadaanchi adila liiransookko; ihukkaarem tuussiisoo baxo baxoo awwaadaanchonne adi'l quunqi dillookko.