Read Hadiyya Kobi'llishshi Kitaaba 15 Bible Online

Kobi'llishshi Kitaaba 15 - Hadiyya bible

Kobi'llishshi Kitaaba 15

¹Er sagar quunqa billisookko; ihukkaarem Jor sagar quunqa iibbisookko.

²Qoor kee'n sagar lachcha wixookko; ihukkaarem qawwuwwi kee'n allab qawwooma wocookko.

³Waa'ik illi hundem beyyom moo'ookko; joraa danaamoo baxoo keeno moo'ookko.

⁴Danaamo wocoo allab heechcha siidisookko; ihukkaarem boqqooma wocoo allab foore hawwodookko.

⁵Qawwi beet annika sogitano gadookko; ihukkaarem do'ixxookkok sogitano macceesookko.

⁶Muccur kee'nnek min lobakat horinne wo'mmaakkoohane; ihukkaarem baaxiilaan siixxitam luwwi ixxuwwina hawwo eebookko.

⁷Qoor kee'n suum lachcha wocookko; odim qawwuwwi kee'n sawwitenne ookki bee'e.

⁸Baaxiilaan keen hincaa'llam kitima Waa'i shigigookko; ihukkaarem er manni uunxat ixxo liiransookko.

⁹Waa'i baaxiilaan kee'n googo shigigookko; ihukkaarem danaamo baxoo keeno iittookko.

¹⁰Hanqo'i googo utta'a jor googonne taakke'llam keenonne Waa'ik booban ubookko; Waa'ika sogitano sabbam keenim letamo.

¹¹Si'oolii bichchi beyyii Waa'i illagenne caakkaakkoohane; ee'isam manni wodanim Waa'i illagenne la'amaakkoohane.

¹²Bolxookkok sogoo mancho ha'yyooyyo; qoolluwwi manni beyyom mareena hasooyyo.

¹³Manni wodan liiramulas illi kolli caakkookko; ihukkaarem Woda'n kichchechchi tiiro hoogisookko.

¹⁴Qoor manchi lachcha hasookko; ihukkaarem qawwi kee'n suum qawwooma wocookko.

¹⁵Ciimamaakkoo manchik heechchi amman hundam hawwaancho; ihukkaarem Woda'n liiranchi beeddoobee'i maadda.

¹⁶Waa'a baddimminne siidamoo gootto'i luwwi hambalaachchi yoo lobakat horiinsi e'llookko.

¹⁷Joranchi yoo beyyonne di'ir baa'l moora itimmiinsi; iitti yoo beyyonne shaaninne itimmi e'llookko.

¹⁸Quuqoo manchi jorancha ki'isookko; ihukkaarem xa'nnoo manchi jorancha siggisookko.

¹⁹Ceemmaalli manchik goog hawwinne ootamaakkoohane; ihukkaarem er manchik goog gudaakkoohane.

²⁰Qoor beet anna liiransookko; ihukkaarem qawwi beet ama gadookko.

²¹Do'ixxi bee'i manchi ixxi qawwoomanne liiramookko; ihukkaarem do'ixxi yoo manchi baxoo baxo xabbaa'aa baxookko.

²²Sogoo manni bee'ulas sawwakko'i sawwit wo'mmoo'nnim gatookko; Sogoo manni lophphaa yoo beyyonne ihukkaarem sawwit wo'mmookko.

²³Manchi laboo dabachcha uwwimminne liiramookko; ammaninne uwwamoo sagarim hinkido'i danaamo!

²⁴Qoolluwwi keen iima'n kolli hooraa awwonsoo heechchi googonne taakke'llamo bagaan, Aad dilliisoo leh googonne taakke'llamoyyo.

²⁵Waa'i bolxoo kee'nneka mine bi'isookko; ihukkaarem aro'i lehu meentichchoka amaxxi hundam egerookko.

²⁶Waa'i baaxiilaanchi manchika sawwite shigigookko; ihukkaarem danaam wocanne liiramookko.

²⁷Qawwiishshinne tirfa siixxeena yakoo manchi ixxi abaroosanne hawwi afoo'isa issookko; ihukkaarem maqanxa aa'oo bee'i manchi lobakat doolle hee'ookko.

²⁸Muccur manchi wocoo luwwa wodanonne sawwaa wocookko; ihukkaarem baaxiilaanchi manchi suum sawwoo'nnim jor woshsha wocookko.

²⁹Waa'i baaxiilaan keeniinsi qee'llookko; ihukkaarem muccur kee'n uunxato macceesookko.

³⁰Illi kolli caakkulas wodan liiramookko; danaam woshsha macceesimmi odim orachcho miqe haareechchi issookko.

³¹Heechcha uwwoo sogitano macceesookkok Qoolluwwi kee'n lambe'enne hosookko.

³²Sogitano sabookkok ixxi gaga hawwodookko; ihukkaarem sogitano macceesoo manchi qoorooma siixxookko.

³³Waa'a baddimmi qooroo'm uwwookko; losano maashaalloom lomba gaassookko.