Read Hadiyya Kobi'llishshi Kitaaba 16 Bible Online

Kobi'llishshi Kitaaba 16 - Hadiyya bible

Kobi'llishshi Kitaaba 16

¹Manni ixxi tiironne sawwookko; ihukkaarem allaphphi dabachchi waa'i beyyiinsette.

²Manchi baxoo bax hundim ixxi gagina hanqa labookko; ihukkaarem Waa'i ixxi woda'n sawwite keenookko.

³Ki baxo hundam Waa'ina yabo uwwe; ki swwit hundim wo'mmookko.

⁴Waa'i qooccu luwwi hundinam mashka'i yoohane; ixxi jor keenom ihukkaare bichchi ballina qooccaakko.

⁵Waa'i bolxitam keeno hundam shigigookko; ixxuwwim guzumo'antoo'n gattambee'isa issookko.

⁶Iittinnee amma'nnanchinnee baaxiil shiinshamookko; Waa'a baddimminne manchi joriinsi daba'llookko.

⁷Mat manchi ixxi taakkonne Waa'a liiransulas Waa'im ee mancho ixxi diina'i lambe'ennem xumminne hee'oo'isa issookko.

⁸Muccuroominne siidamoo hoffi luwwi damiginne siidamoo lobakat amaxxiinsi e'llookko.

⁹Manni ixxi tiironne issoo luwwa sawwookko; ihukkaarem Waa'i oo sawwit wo'mmoo'isa issookko.

¹⁰Adil oogatookkok Waa'iinsi uwwamu daannoominnette; ee bikkina hundi ammanem hanqa oogatookko.

¹¹Hanqo'i keennaanchii keenakkam mu'utii Waa'iinsette; gonoo'n woronne yoo keennaanchuwwim Waa'i baxo.

¹²Adillan qoxxookkok hanqinnette ihu bikkina jora baximmi adi'l beyyonne sabamaakkoohane.

¹³Adilluwwi hanqo'i wocanne liirantamo; hanqa wocookkokam iittitamo.

¹⁴Adi'llek quunqi shoo asse'amaanchisa; ihukkaarem qoor manchi quunqa billisookko.

¹⁵Adi'llek illi caakkoohaare heechchi siidamookko; ixxi illagenne nuura siidimmi qaraaxonne ga'nnoo xee'nnisa.

¹⁶Worqiinsi loboka qoorooma siixximmi biriinsem loboka qoossimma doo'llimmi lobakata erane.

¹⁷Xabbeen manni goog joriinsi qee'llimma; maroo googo ege'lloo manchi ixxi foore ege'llookko.

¹⁸Bolxoom bichchanne massookko; yoo luwwanne bakke'immim ubimmanne afisookko.

¹⁹Bolxoo keeninne maqire bogakko'i luwwa baxxamimmiinsi; maashaalli keeninne maqire buxoominne hee'immi e'llookko.

²⁰Sogitano macceesoo manchi er luwwa siixxookko; Waa'anne bakke'oo manchim maase'amaakkoohane.

²¹Tiiro qoor manchi qoossoohane yamamookko; ixxi suumiinsim er losan firookko.

²²Qoorooma ixxi gaqqan issaqqu manchina heechcha uwwookko; ihukkaarem qawwuwwi keen ixxuwwi qawwoominnem guzumo'antamo.

²³Qoor manchi woceena gaassaatim sawwookko; ixxi wocoo woshshi hundim mulli keenina losano haraassookko.

²⁴Er woshshi maraphphi damaa'mmisa xee'ookko; orachinam fayya'ooma uwwookko.

²⁵Mannina xabbeena laboo goog yookko; ihukkaarem lasaanchoom lehina afisookko.

²⁶Manni itoo hurbaata siideena qoxxaa baxookko; sibaarim manni baxoo'isa issookko.

²⁷Awwaad bee'i manchi jor luwwa sawwookko; wocoo woshshim gii'llisa shokkiisoohane.

²⁸Boqqi manchi manni lambe'enne jorancha wixookko; hamo taakkiisoo manchim besha annanni issookko.

²⁹Baaxiilaanchi manchi ixxi beshichcho qawwiisookko; bichchi googonne hooraatim awwonsookko.

³⁰Illinne qaqqasoo manchi jora sawwookko; inqe iicoo manchim jolla baxookko.

³¹Abo'i lombina mare'e; oohim muccuroo'm googonne siidamookko.

³²Xa'nnoo manchi malaayyaam manchiinsi e'llookko; gaga ijaaccoo manchim dut beero'uwwa malaayyinne amadoo manchiinsi lophphookko.

³³Manni Waa'ikka doo'lla la'mmina saamo ubbuusookko; ihukkaarem oo woshshi wo'mmoo'isa issookkok Waa'a.